مينيسترلىك: ايگىلى ساۋندترەكتەر كونسەرتىن ۇيىمداستىرۋ ءۇشىن رۇقسات الۋدىڭ قاجەتى جوق

استانا. KAZINFORM - مادەنيەت جانە اقپارات مينيسترلىگى Kazinform ەلدە كينو، مۋلتفيلم، تەلەتوپتاما ساۋندترەكتەرىنەن كونسەرت ۇيىمداستىرۋدىڭ ءتارتىبى تۋارلى مالىمەت بەردى.

قازىر استانا، الماتى سياقتى قالالاردا ايگىلى كينوتۋىندىلاردىڭ ساۋندترەكتەرىنەن كونسەرت ۇيىمداستىرۋ سانگە اينالىپ كەلەدى. كەيبىر ساراپشىلار بۇل كونسەرتتى ۇيىمداستىرۋشىلار حالىقارالىق اۆتورلىق قۇقىق تالاپتارىن ساقتاي بەرمەيتىنىن ايتادى.

- كينو، مۋلتفيلم، تەلەتوپتاما ساۋندترەكتەرىنەن ۇيىمداستىرىلاتىن كونسەرتتەر كوممەرتسيالىق جوبالار بولىپ ەسەپتەلەدى. سونىمەن قاتار، قازاقستاندا اتالعان جوبالاردى وتكىزۋ ءۇشىن ليسەنزيا الۋ، رەسمي تىركەۋ قولدانىلمايدى. اتالعان جوبالاردى وتكىزۋ كەزىندە ۇيىمداستىرۋشىلار ق ر اۆتورلىق قۇقىق جانە (نەمەسە) ساباقتاس قۇقىقتار تۋرالى زاڭىن ەسكەرۋ قاجەت. سونداي-اق، ۋاكىلەتتى ورگان كوممەرتسيالىق كونسەرتتەردى وتكىزىپ ۇيىمداستىرۋى ءۇشىن رۇقسات بەرمەيدى، - دەپ جازىلعان جاۋاپتا.

ەسكە سالساق، «ب. قالداياقوۆانىڭ ءشامشى الەمى» قورىنىڭ اتقارۋشى ديرەكتورى بوتاگوز قالداياقوۆا الەمگە ايگىلى ساۋندترەكتەردىڭ كونتسەرتىن ۇيىمداستىرۋشىلار قازاقستاندى حالىقارالىق داۋعا دۋشار ەتۋ مۇمكىن ەكەنىن ايتقان ەدى.

«عالامات عاسىر: سۇلەيمەن سۇلتان» سەريالىنىڭ ساۋندرەكتەرى دەگەن سياقتى كونسەرتتەر قاپتاپ كەتتى عوي. سونى وتكىزىپ جۇرگەندەردىڭ ەشقايسىسى الەم جۇلدىزدارىنا، ورىنداۋشىلارعا اۆتورلىق سىياقى تولەپ جاتقان جوق. ونىڭ ءبارى «پيراتتىق كونتەنت». شەتەلدىك اۆتورلار ءوز ەلىنەن بىزگە شاعىم تۇسىرسە، اسا ءىرى حالىقارالىق داۋ بولادى»، - دەيدى ساراپشى.

ايتا كەتسەك، ادىلەت ۆيتسە-ءمينيسترى بوتاگوز جاقسەلەكوۆا الماتىدا اۆتورلىق قوعام وكىلدەرىمەن كەزدەسىپ، اۆتورلىق قۇقىق ماسەلەسىنە مەملەكەتتىك مونوپوليا ەنگىزۋ ۇسىنىسى تۋرالى ماسەلەلەردى تالقىلاعان بولاتىن.

 

ەسىمجان ناقتىباي