مينيسترلەر كابينەتىنىڭ باس حاتشىسى جانجالعا بايلانىستى وتستاۆكاعا كەتتى
جاپون مينيسترلەر كابينەتىنىڭ باس حاتشىسى جانە ۇكىمەتتەگى «ەكىنشى ادام» حيروكادزۋ ماسۋنو بيلەۋشى ليبەرال-دەموكراتيالىق پارتياداعى (ل د پ) ساياسي قايىرىمدىلىق كەزىندە قارجىلىق ەسەپ بەرۋدە كەتكەن كەمشىلىكتەردەن تۋىنداعان جانجالدان سوڭ وتستاۆكاعا كەتتى. بۇل تۋرالى باسپا ءسوز ءماسليحاتىندا ءوزى مالىمدەدى. Kazinform اگەنتتىگى بۇل تۋرالى تاسس اقپارات اگەنتتىگىنە سىلتەمە جاساپ حابارلايدى.
«مەن پرەمەر-مينيستر كيسيداعا ساياساتتى ىسكە اسىرۋدا ىركىلىس تۋدىرماس ءۇشىن مينيسترلەر كابينەتىنىڭ باس حاتشىسى قىزمەتىنەن كەتكىم كەلەتىنىن حابارلاپ، وتستاۆكاعا ءوتىنىش بەردىم»، - دەدى ول.
جانجال ل د پ-نىڭ بىرنەشە فراكسياسىنا، نەگىزىنەن بۇرىنعى پرەمەر-مينيستر سيندزو ابەنىڭ ەڭ ۇلكەن ىشكى پارتيالىق توبىنا قاتىستى تۋىندادى جانە ۇكىمەت رەيتينگىنىڭ شامامەن %23 دەيىن تومەندەۋىنە اكەلىپ، «قاۋىپتى دەڭگەيگە» ءتۇستى.
بۇعان دەيىن جاپونيانىڭ ەكونوميكا، ساۋدا جانە ونەركاسىپ ءمينيسترى ياسۋتوسي نيسيمۋرا، اۋىلشارۋاشىلىق ۆەدومستۆوسىنىڭ باسشىسى يتيرو مياسيتا، سونداي-اق اكىمشىلىك ماسەلەلەر جونىندەگى ءمينيسترى دزيۋندزي سۋدزۋكي دە وتستاۆكاعا كەتۋگە ءوتىنىش بەرگەن.
بۇدان باسقا، ماسۋنونىڭ ايتۋىنشا، ءمينيستردىڭ بەس ورىنباسارى، پارلامەنتتىك ۆيتسە-مينيستر جانە قورعانىس ءمينيسترىنىڭ كەڭەسشىسى وتستاۆكاعا كەتكەن.
ونىڭ ءبارى - ابە فراكسياسىنىڭ مۇشەلەرى.
سونىمەن قاتار، وسى فراكسيانىڭ تاعى ءبىر بەلدى مۇشەسى، ل د پ ساياسي كەڭەسىنىڭ باسشىسى كويتي حاگيۋدا قىزمەتىنەن كەتۋدى جوسپارلاپ وتىر.
پارلامەنتتىڭ جوعارعى پالاتاسىنداعى لدپ فراكتسياسىنىڭ جەتەكشىسى حيروسيگە سەكو مەن پارتيانىڭ پارلامەنتپەن ءوزارا ءىس-قيمىل جونىندەگى كوميتەت باسشىسى سۋەسي تاكاگي دە قىزمەتىنەن ايىرىلۋى مۇمكىن.
