مينيستر ستۋدەنتتەردى «بولاشاق» باعدارلاماسى بويىنشا سۋ سالاسىنا ماماندانۋعا شاقىردى
استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ نازاربايەۆ ۋنيۆەرسيتەتىندە ءوتىپ جاتقان حالىقارالىق فورۋمدا ستۋدەنتتەردى «بولاشاق» باعدارلاماسى بويىنشا سۋ سالاسىنا ماماندانۋعا شاقىردى.
«قاڭتار ايىنىڭ سوڭىندا عىلىم جانە جوعارى ءبىلىم مينيسترلىگىمەن بىرلەسىپ وتكەن كەڭەستە «بولاشاق» ءبىلىم بەرۋ باعدارلاماسىنا «گيدروگەولوگيا»، «سۋ رەسۋرستارى» جانە «سۋ قاۋىپسىزدىگى» سياقتى جاڭا سۋ ماماندىقتار ەنگىزىلگەنى جاريالاندى. قازاقستاندىق ستۋدەنتتەر وسى جىلدان باستاپ اتالعان ماماندىقتار بويىنشا شەتەلدە ءبىلىم الا الادى. مەن بارشانى وسى پروتسەسكە بەلسەندى اتسالىسۋعا شاقىرامىن»، - دەدى نۇرجان نۇرجىگىتوۆ.
سونداي-اق، ول جەتەكشى تەحنولوگيالاردى مەڭگەرۋ ءۇشىن سۋ سالاسىنداعى وزىق جەتىستىكتەرى بار ەلدەرمەن تاجىريبە الماسۋ جولعا قويىلىپ جاتقانىن اتاپ ءوتتى.
«مينيسترلىك جەتەكشى مامانداردى تارتۋ، وتاندىق كادرلاردى دايارلاۋ جانە بىلىكتىلىگىن ارتتىرۋ، جوعارى وقۋ ورنىنان كەيىنگى ءبىلىم بەرۋدىڭ بىرلەسكەن باعدارلامالارى، سۋارۋدىڭ، ۇنەمدەۋدىڭ جانە سۋدى تازارتۋدىڭ زاماناۋي تەحنولوگيالارىن ەنگىزۋ سياقتى ماسەلەلەر بويىنشا ۇلى بريتانيا، گەرمانيا، فرانسيا، قىتاي جانە تۇركيا سىندى شەتەلدىك سەرىكتەستەرمەن تۇراقتى كەزدەسۋ وتكىزەدى»، - دەدى ول.
