مينيستر: قوسشى مەن تايتوبەگە تاسقىن قاۋپى ءتونىپ تۇر

استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ۇكىمەت وتىرىسىندا استانا ىرگەسىندەگى ءۇش ەلدى مەكەنگە نۇرا وزەنىنەن تاسقىن قاۋپى ءتونىپ تۇرعانىن باياندادى.

«استانا سۋ قويماسىنا 26-30-ناۋرىز ارالىعىندا 150 ميلليون تەكشە مەتر سۋ ءتۇستى. ياعني، سۋ ورتاشا كوپ جىلدىق تۇسىمنەن ەداۋىر اسىپ ءتۇستى. استانا سۋ قويماسىنان سۋدىڭ توگىلۋىن بولدىرماۋ ءۇشىن 29-ناۋرىزدا ەسىل وزەنىنىڭ ارناسىن جۋۋ ءۇشىن تومەنگى بەفكە سۋ جىبەرىلدى. قاراعاندى وبلىسىندا ورنالاسقان سامارقاند سۋ قويماسى بۇگىنگى تاڭدا %100 تولعان.. ۇلىتاۋ وبلىسىندا ورنالاسقان شەرۋباي- نۇرا سۋ قويمالارى بۇگىنگى تاڭدا %96 تولعان. سامارقاند جانە شەرۋباي- نۇرا سۋ قويمالارىنان تاستالعان جانە تومەن جاعىنان قوسىلاتىن بۇيىرلىك اعىندارىن ەسەپدەگەندە نۇرا وزەنى ارقىلى پرەوبراجەنسك سۋ تورابىنا شامامەن 4-ءساۋىر ايىنا 2500 م3/سەك سۋ اعىنى كۇتىلۋدە. ءوز كەزەگىندە قوشقاربايەۆ، قوسشى، تايتوبە ەلدى مەكەندەرىن سۋ باسۋ قاۋپى ءتونىپ تۇر. وسىعان بايلانىستى جەرگىلىكتى اتقارۋشى ورگاندار ءتيىستى شارالاردى قامتاماسىز ەتۋ كەرەك»، - دەدى مينيستر.

ۆەدومستۆو باسشىسى ۇلىتاۋ وبلىسىنداعى كەڭگىر سۋ قويماسىنا تولعان سۋدى سارىسۋ وزەنى ارقىلى قىزىلوردا وبلىسىنىڭ اۋماعىندا ورنالاسقان تەلىكول كولىنە جىبەرىلىپ جاتقانىن ايتتى.

اۆتور
ەسىمجان ناقتىباي