مينيستر قازاقستاندا حيدجاب كيۋگە قاتىستى مالىمدەمە جاسادى

ءدىن
Фото: Freepik

 مادەنيەت جانە اقپارات ءمينيسترى ايدا بالايەۆا حيدجابقا قاتىستى مالىمدەمە جاسادى، - دەپ حابارلايدى Tengrinews.kz. 

«مەن مينيستر رەتىندە ءدىني تاقىرىپتى ادەيى پايدالاناۋعا قاتىستى الاڭدايمىن. بۇل ادامداردىڭ سەزىمى مەن سەنىمىنە قاتىستى بولعاندىقتان، بولمايدى. ءبىز جانە جۋرناليستەر بۇل تاقىرىپتى وتە مۇقيات قامتىپ، ەگجەي-تەگجەيىن، ءمان-جايىن ناقتىلاۋىمىز كەرەك، ويتكەنى قازىر حيدجابقا تىيىم سالۋ تۋرالى ايتىلىپ جاتىر. ءبىراق بۇل تۋرالى اڭگىمە بولعان جوق.

اڭگىمە نيكاب، پارانجا جانە بەتتى جاۋىپ تۇراتىن، سول ارقىلى ادامدى انىقتاۋدى جانە سايكەستەندىرۋدى قيىنداتاتىن ءدىني كيىمدەرگە تىيىم سالۋ تۋرالى بولىپ وتىر»، - دەدى بالايەۆا Tengrinews.kz تىلشىسىنە.

مينيستر بەتتى جاۋىپ تۇراتىن كيىمگە تىيىم سالۋ قاۋىپسىزدىك تۇرعىسىنان ماڭىزدى ەكەنىن اتاپ ءوتتى.

«قازىر الەمنىڭ بارلىق وركەنيەتتى ەلى وسى جولمەن ءجۇرىپ كەلە جاتىر، قاي جەردە تىيىم سالعانىن قاراڭىزدار. مەن مەملەكەت زايىرلىق پەن ءدىني سەنىم بوستاندىعى قاعيداتتارىنان ەشقاشان باس تارتپايتىنىن تۇسىندىرگىم كەلەدى، ويتكەنى بۇل ءبىزدىڭ كونستيتۋتسيامىزدا جازىلعان. مۇنى قوعامعا جەتكىزۋ ماڭىزدى، ويتكەنى قازىر ءتۇرلى وقۋلار كوبەيىپ، حالىقتىڭ ءبىر بولىگى الاڭداپ، رەسمي وتىنىشتەر نەمەسە كەيبىر پەتيتسيالارعا قول قويا باستايدى»، - دەدى بالايەۆا.

ول مادەنيەت جانە اقپارات مينيسترلىگى ءدىن سالاسىنداعى ۋاكىلەتتى ورگان رەتىندە ۇكىمەتكە ءماجىلىس پەن سەنات دەپۋتاتتارىنان تۇسكەن وتىنىشتەردى جان-جاقتى زەرتتەيتىنىن ايتتى.

«وسى ماسەلەلەردىڭ بارلىعى تالقىلانادى، مينيسترلىك جانىنداعى قوعامدىق كەڭەس بار، ساراپشىلىق كەڭەستەر بار. زاڭنامالىق وزگەرىستەردى تالاپ ەتەتىن ماسەلەلەردىڭ ءبارى جاي عانا قابىلدانبايدى، ءبىرىنشى كەزەكتە ساراپشىلار اراسىندا پىكىرتالاس، قوعام اراسىندا پىكىرتالاس بولادى، سودان كەيىن عانا ناقتى شارالار قابىلدانادى»، - دەدى بالايەۆا.

ءمينيستردىڭ ايتۋىنشا، قوعامداعى بىرلىك پەن قاۋىپسىزدىكتىڭ باسىم ماسەلەلەرى كۇن سايىن جاڭارىپ وتىرادى.

«ەلدەگى قاۋىپسىزدىككە تەك مەملەكەت عانا ەمەس، ءاربىر ادام جاۋاپتى ەكەنىن ءتۇسىنۋىمىز وتە ماڭىزدى. بۇل اقپارات تاراتۋعا، ءبىزدىڭ ءىس-ارەكەتىمىزگە قاتىستى. بۇل سۇراقتار بۇگىن قويىلدى، مەن وسىنى تۇسىندىرگىم كەلەدى»، - دەدى مينيستر.

بالايەۆا مەكتەپتەردە حيدجاب كيۋ ماسەلەسىنە نۇكتە قويىلعانىن ايتتى.

«ءبىز زايىرلى مەملەكەتپىز، مەكتەپ فورماسىنا قاتىستى ءبىرىڭعاي ستاندارتتى كوزدەيتىن ۋاكىلەتتى ورگاننىڭ بۇيرىعى بار. ءسوزسىز»، - دەپ قورىتىندىلادى بالايەۆا.

سوڭعى جاڭالىقتار