مينيستر ۋاقىت بەلدەۋىنىڭ اۋىسۋى تۋرالى: بالالارىم تاڭەرتەڭ ەش قيىندىقسىز ويانادى

استانا. KAZINFORM - ساۋدا جانە ينتەگراتسيا ءمينيسترى ارمان شاققاليەۆ ۋاقىت بەلدەۋىنىڭ وزگەرۋى قازاقستاندىقتاردىڭ ەلەكتر ەنەرگياسىنا جۇمسايتىن شىعىندارىن كوبەيتپەگەنىن مالىمدەدى.

«ۋاقىت بەلدەۋىنىڭ وزگەرۋىنە بايلانىستى نەگىزگى ويدى جەتكىزگىم كەلەدى - ەلەكتر ەنەرگياسىن تۇتىنۋ ايتارلىقتاي وسكەن جوق. قازىر كوپتەگەن ميفتەر مەن اڭىزدار شىعارىلىپ ءجۇر. ءبىز ساتىپ الۋ كولەمدەرىن سالىستىردىق، بۇل اقپارات قولىمىزدا بار. ءتىپتى ۆيتسە-مينيستر ەسىمحانوۆ (ەنەرگەتيكا ۆيتسە-ءمينيسترى - رەد.) مىرزا سۇحباتىندا كورشى ەلدەردەن ەلەكتر ەنەرگياسىن ساتىپ الۋ كولەمى ازايعانىن ايتتى»، - دەدى ا. شاققاليەۆ ۇكىمەتتە وتكەن بريفينگتە.

مينيستر اتا-انالاردىڭ مەكتەپتەن بالالارىن قاراڭعى ۋاقىتتا الىپ كەتۋگە قاتىستى شاعىمدارىنا دا جاۋاپ بەردى.

«ۋاقىتىم بولعاندا، بالالارىمدى مەكتەپتەن ءوزىم الىپ كەتەمىن. ءتورت بالانىڭ اكەسى رەتىندە، ەكىنشى اۋىسىم 19:05-تە اياقتالاتىنىن ايتقىم كەلەدى. وتكەن جىلى دا ءبىز قاراڭعىدا قايتاتىنبىز. بالالارىم تاڭەرتەڭ ەش قيىندىقسىز ويانادى. مۇنى كوپتەگەن اتا-انالار دا ايتىپ جاتىر. ءبىز ولارعا تاڭەرتەڭگى ۋاقىتتى بەردىك، ۇيقىسىن قاندىرىپ، مەكتەپكە بارۋعا مۇمكىندىك بەردىك. وسىنى ايتۋ كەرەك. باسقا سەزىمدەر مەن وزگەرىستەر تۋرالى ايتۋ كەرەك»، - دەپ تۇيىندەدى مينيستر.

بۇعان دەيىن ارمان شاققاليەۆ ۋاقىت بەلدەۋىن اۋىستىرۋ شەشىمى قالاي قابىلدانعانىن ايتقان ەدى.

اۆتور
ايجان سەرىكجان قىزى