مىنا جاڭاجىلدىق اندەردى كولىكتە تىڭداۋ قاۋىپتى بولىپ شىقتى

استانا. قازاقپارات - وڭتۇستىك قىتاي تەحنولوگيالىق ۋنيۆەرسيتەتىنىڭ عالىمدارى ءاننىڭ كولىك جۇرگىزۋگە قالاي اسەر ەتەتىنىن زەرتتەدى.

زەرتتەۋشىلەر سوققىسى مينۋتىنا 120 دان جوعارى اۋەندەر اگرەسسيانى تۋدىرۋى نەمەسە زەيىندى تومەندەتۋى مۇمكىن ەكەنىن انىقتادى. وسىنداي قارقىنى جىلدام اندەردىڭ اراسىندا جاڭاجىلدىق مۋزىكا دا بار، - دەپ حابارلايدى New York Post.

جۇرگىزۋشىلەر ءۇشىن ەڭ قاۋىپتى جاڭاجىلدىق ءان Frosty The Snowman دەپ تانىلدى، ونىڭ ىرعاعى مينۋتىنا 172 سوققىعا جەتەدى. سودان كەيىن مەرايا كەريدىڭ ايگىلى حيتى - "All I Want For Christmas Is You"، اندە مينۋتىنا 150 سوققى. سونداي-اق تىزىمگە حوسە فەليسيانونىڭ "Feliz Navidad" جانە "Santa Claus Is Comin" to Town" كىردى.

جىگەرلى مۋزىكا ەموتسيونالدى كۇيگە اسەر ەتۋى، جۇرەك سوعۋىن تەزدەتۋى جانە جولعا نازار اۋدارۋدى ناشارلاتۋى مۇمكىن، بۇل جول اپاتىنىڭ ىقتيمالدىعىن ارتتىرادى.

سوندىقتان جۇرگىزۋشىلەر ىرعاعى مينۋتىنا 120 سوققىدان تومەن اندەرگە ارتىقشىلىق بەرۋى كەرەك. ماماندار جولعا نازار اۋدارۋ ءۇشىن اراسىندا ءان تىڭداۋدى توقتاتۋدى ۇسىنادى.

كولىك جۇرگىزۋ كەزىندە ءاننىڭ داۋىسى دا كولىك جۇرگىزۋ قاۋىپسىزدىگىندە ماڭىزدى ءرول اتقارادى. جۇرگىزىلگەن زەرتتەۋ ناتيجەسىنە سايكەس، ءاندى قاتتى داۋىستا تىڭداۋ جۇرگىزۋشىنىڭ كلاكسون، سيرەنا نەمەسە باسقا كولىكتەردىڭ شۋى سياقتى سىرتقى سيگنالدارعا رەاكسياسىن باسەڭدەتۋى مۇمكىن. سەبەبى تىم قاتتى مۋزىكا ەستۋ جۇيەسىن شامادان تىس جۇكتەيدى، قورشاعان دىبىستاردى قابىلداۋ قابىلەتىن تومەندەتەدى جانە نازاردى جولدان الشاقتاتادى.

ساراپشىلار دىبىس دەڭگەيىن جۇرگىزۋشى كولىكتەن تىس جەردە نە بولىپ جاتقانىن انىق ەستي الاتىنداي دەڭگەيدە ۇستاۋدى ۇسىنادى، بۇل اسىرەسە تىعىز قوزعالىس جاعدايىندا نەمەسە بەيتانىس جولداردا ماڭىزدى.