ميلانانىڭ ءولىمى: قىزدىڭ اناسى 20 جىلعا، ەر ادام ءومىر بويىنا باس بوستاندىعىنان ايىرىلدى

پاۆلودار. KAZIMFORM - جەتى جاسار ميلانا داۆىدوۆانىڭ ءولىمى بويىنشا بىرنەشە ايعا سوزىلعان سوت ىسىنە نۇكتە قويىلدى. سوتتىڭ شەشىمىمەن قىزدىڭ اناسى 20 جىلعا، ال ەكىنشى ايىپتالۋشى - ەر ادام ءومىر بويىنا باس بوستاندىعىنان ايىرىلدى. سوت ۇكىمى جاريالانعان ساتتە ەر ادام وزىنە ءوزى قول جۇمساپ، سول قولىنىڭ بۋىن تۇسىن كەسىپ جىبەرگەن.

پاۆلودار وبلىسى قىلمىستىق ىستەر جونىندەگى مامانداندىرىلعان اۋدانارالىق سوتى جاس بالانى ءولتىرۋ بويىنشا ايىپتالعان ەكى سوتتالۋشىعا قاتىستى قىلمىستىق ءىستى قارادى.

سوت بارىسىندا مەملەكەتتىك ايىپتاۋشى وقيعانىڭ بارىسىن باياندادى. قىزدىڭ اناسى د. تانىسى ا. -مەن ىشىمدىكتى جۇيەلى ىشە وتىرىپ، سوڭى ءينتيمدى قارىم-قاتىناسقا ۇلاسقان.

ايەلدىڭ كۇيەۋى مال باعۋعا كەتسە، ال بالالارى مەكتەپتە بولعان. سونى پايدالانىپ ەكەۋى جىنىستىق قارىم-قاتىناسقا تۇسكەن. وسى ۋاقىتتا قىزى ميلانا داۆىدوۆا مەكتەپتەن ورالىپ، اناسىنىڭ ۇياتسىز قىلىعىنا كۋا بولعان. وقيعانى اكەسىنە جەتكىزىپ باراتىن ايتقان.

«ەكەۋى ماساڭ كۇيدە جاس بالانى ولتىرۋگە شەشىم قابىلداعان. وسى نيەتتەرىن جۇزەگە اسىرا وتىرىپ، قىزدىڭ اناسى ونىڭ باسىنان بىرنەشە رەت قاتتى سوققى جاساعان. ەدەنگە قۇلاعاننان كەيىن، ەسىن جوعالتقانشا ونى بەلدىكپەن ۇرعان. سودان كەيىن ەر ادام جابىرلەنۋشىنىڭ اعاسىنىڭ كوزىنشە جاس بالانى بەلدىكپەن بۋىندىرىپ ولتىرگەن. سوتتالۋشىلاردىڭ كىناسى كۋالاردىڭ ايعاقتارىمەن، سوت ساراپتامالارىنىڭ قورىتىندىلارىمەن جانە سوتتا زەرتتەلگەن باسقا دا دالەلدەمەلەرمەن دالەلدەندى»، - دەپ حابارلادى پاۆلودار وبلىستىق سوتىنىڭ باسپا ءسوز قىزمەتىنەن.

سوتتا مارقۇم قىزدىڭ اناسى كىناسىن مويىندامادى. ەر ادام دا ءوزىنىڭ كىناسىن مويىنداماي، ءىس-ارەكەتىن ونشا اۋىر ەمەس، ياعني قىلمىستى جاسىرىپ قالۋ جانە قىلمىس تۋرالى حابارلاماۋ رەتىندە قايتا سارالاۋدى سۇرادى.

ەر ادام بۇرىن سوتتالعان، پسيحواكتيۆتى زاتتارعا تاۋەلدىلىكتەن زارداپ شەگەدى، قىلمىستى ماساڭ كۇيدە جاساعان. وسىنى جانە اسا اۋىر قىلمىس جاساۋدىڭ ءمان-جايلارىن ەسكەرە وتىرىپ، سوتتىڭ ۇكىمىمەن ەر ادامعا ءومىر بويىنا باس بوستاندىعىنان ايىرۋ جازاسى تاعايىندالدى.

ال قىلمىستىق كودەكستىڭ 46-بابىنىڭ 4-بولىگىنە سايكەس ءومىر بويىنا باس بوستاندىعىنان ايىرۋ جازاسى ايەلدەرگە تاعايىندالمايتىندىعىنا بايلانىستى، سوت ايەلدى 20 جىلعا باس بوستاندىعىنان ايىردى. سونداي-اق، ول پەداگوگيكالىق جانە كامەلەتكە تولماعاندارمەن جۇمىس ىستەۋگە بايلانىستى لاۋازىمداردى اتقارۋ قۇقىعىنان ايىرىلدى.

سوت ۇكىمى زاڭدى كۇشىنە ەنگەن جوق.

اتاپ وتەرلىگى، سوتتىڭ ۇكىمى وقىلعان ساتتە ايىپتالۋشى ا. ءوزىن-ءوزى وتكىر زاتپەن جاراقاتتاعان.

«بۇگىن سوت زالىندا 7 جاسار ميلانا داۆىدوۆانى ءولتىردى دەپ ايىپتالعان ايىپتالۋشى سوت ۇكىمى شىققان كەزدە سول قولىنىڭ بۋىنىن كەسىپ تاستادى. ايىپتالۋشىنى دارىگەرلەر تەكسەرەدى، مەديتسينالىق كومەك پەن اۋرۋحاناعا جاتقىزۋدىڭ قاجەتى جوق»، - دەلىنگەن وبلىستىق ءى ءى د حابارلاماسىندا.

ەسكە سالا كەتەيىك، ميلانا بىلتىر 17-قاراشا كۇنى ەكىباستۇزدان 50 شاقىرىم جەردەگى بەسقاۋعا اۋىلىندا جوعالىپ كەتتى.

وسى كۇنى كەشكىسىن ساعات 9:00 شاماسىندا قىزدىڭ اناسى پوليتسياعا شاعىم ءتۇسىردى. ميلانانى ەكى تاۋلىك بويى 400 ادام ىزدەدى.

ءتىپتى ىزدەۋ جۇمىستارىنا تىكۇشاق پەن كينولوگتەر دە جۇمىلدىرىلدى.

19-قاراشادا 7 جاسار ميلانانىڭ دەنەسى قوقىستان تابىلدى.

ميلانانىڭ ولىمىنەن سوڭ وبلىس اكىمىنىڭ ورىنباسارى، ەكىباستۇزدىڭ اكىمى، باسقارما باسشىلارى سوگىس الدى.

اۆتور
مۇرات اياعان