ميكروقارجى ۇيىمدارىنا بورىشكەرلەرگە ساعات 21:00 دەن كەيىن قوڭىراۋ شالۋعا تىيىم سالىنباق
استانا. KAZINFORM - قارجى نارىعىن رەتتەۋ جانە دامىتۋ اگەنتتىگى ميكروقارجى ۇيىمدارىنىڭ بورىشىن وتەۋ مەرزىمىن كەشىكتىرگەن قارىز الۋشىلارمەن ءوزارا ءىس-قيمىلىن ناقتى رەتتەمەك. اگەنتتىكتىڭ ءتيىستى قاۋلى جوباسى اشىق ن ق ا پورتالىندا جاريالاندى.
«بانك قىزمەتتەرىن كورسەتۋ جانە بانكتەردىڭ، بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمداردىڭ بانك قىزمەتتەرىن ۇسىنۋ پروتسەسىندە تۋىندايتىن كليەنتتەردىڭ وتىنىشتەرىن قاراۋى قاعيدالارىن بەكىتۋ تۋرالى» ۇلتتىق بانك قاۋلىسىنا سايكەس، بانك قىزمەتكەرلەرى بورىشكەرلەرگە 08:00 دەن 21:00 گە دەيىن عانا قوڭىراۋ قالا الادى.
اگەنتتىك ءدال وسىنداي قاعيدانى ميكروقارجى ۇيىمدارىنا دا قولدانۋ قاجەت دەپ ەسەپتەيدى.
«ميكروقارجى ۇيىمدارى قىزمەتكەرلەرىنىڭ نەگىزسىز قوڭىراۋلارى سالدارىنان قارجىلىق قىزمەتتەرگە تۇتىنۋشىلار تاراپىنان نارازىلىق تاۋەكەلدەرىن بولدىرماۋ ماقساتىندا جوعارىدا اتالعان شەكتەۋلەردى ميكروقارجى ۇيىمدارىنا دا قولدانۋ قاجەت دەپ سانايمىز»، - دەلىنگەن قاۋلى جوباسىندا.
سونىمەن قۇجاتقا سايكەس، م ق ۇ قىزمەتكەرى جۇمىس كۇندەرى ساعات 8:00 دەن 21:00 گە دەيىنگى كەزەڭدە قارىز الۋشىنىڭ تۇرعىلىقتى جەرى نە ورنالاسقان جەرى، نە قارىز الۋشىنىڭ تىركەلگەن جەرى بويىنشا نە ۇيىمنىڭ (فيليالدىڭ) ءۇي-جايىندا اپتاسىنا ءۇش رەتتەن ارتىق ەمەس جانە ەگەر وزگە ۋاقىت، كەزەڭدىلىك جانە كۇن (دەمالىس جانە (نەمەسە) مەرەكە) قارىز الۋشىمەن كەلىسىلمەگەن جانە شارتتا كوزدەلگەن بولسا، جۇمىس كۇنى ءبىر رەتتەن ارتىق ەمەس ءىس-قيمىل جاسايدى.
بۇل رەتتە قوڭىراۋ شالۋشى ۇيىمنىڭ اتاۋىن؛ ۇيىمنىڭ ورنالاسقان جەرىن؛ ءوزىنىڭ اتى-ءجونى مەن لاۋازىمىن؛ شارتتا كوزدەلگەن بەرەشەكتىڭ، نەگىزگى بورىشتىڭ، سىياقىنىڭ، كوميسسيالاردىڭ، ايىپاقىنىڭ (ايىپپۇلدىڭ، ءوسىمپۇلدىڭ) مەرزىمى وتكەن جانە اعىمداعى سومالارى قالدىعىنىڭ قۇرىلىمدارىن ايتۋى قاجەت.
قۇجات 19-قىركۇيەككە دەيىن قوعامدىق تالقىلاۋعا شىعارىلىپ وتىر.
