ميحايل كاۆەلاشۆيلي گرۋزيا پرەزيدەنتى بولىپ سايلاندى

استانا. KAZINFORM - داۋىستاردى ساناۋ قورىتىندىسى بويىنشا گرۋزيانىڭ التىنشى پرەزيدەنتى بولىپ بيلىكتەگى «گرۋزين ارمانى - دەموكراتيالىق گرۋزيا» پارتياسىنىڭ كانديداتى، پارلامەنتتىڭ بۇرىنعى دەپۋتاتى ميحايل كاۆەلاشۆيلي سايلاندى، دەپ حابارلايدى Kazinform-نىڭ مەنشىكتى ءتىلشىسى.

300 سايلاۋشىلار القاسىنىڭ 224 مۇشەسى كاۆەلاشۆيليگە داۋىس بەردى. ءبىرىنشى تۋردا جەڭىسكە جەتۋ ءۇشىن وعان سايلاۋشىلاردىڭ ۇشتەن ەكىسىنىڭ داۋىسىن الۋ كەرەك بولدى.

- ورتالىق سايلاۋ كوميسسياسىنىڭ حاتشىسى ۇسىنعان ناتيجەلەر بويىنشا ميحايل كاۆەلاشۆيلي پرەزيدەنت بولىپ سايلاندى، - دەدى وسك ءتوراعاسى گەورگي كالانداريشۆيلي سايلاۋدىڭ قورىتىندى حاتتاماسىنا قول قويا وتىرىپ.

وسك حاتشىسى گەورگيي ءدجاۆاحيشۆيليدىڭ ايتۋىنشا، پرەزيدەنتتىك سايلاۋعا بارلىعى 225 سايلاۋشى قاتىستى. ءبىر بيۋللەتەن جويىلدى. گرۋزيانىڭ التىنشى پرەزيدەنتى بەس جىلدىق مەرزىمگە سايلاندى جانە 29 جەلتوقساندا ۇلىقتاۋ ءراسىمى وتەدى.

ميحايل كاۆەلاشۆيلي - فۋتبولدان گرۋزيا ۇلتتىق قۇراماسىنىڭ بۇرىنعى شابۋىلشىسى جانە گرۋزيا پارلامەنتىنىڭ ءۇش شاقىرىلىمىنىڭ دەپۋتاتى.

گرۋزياداعى پرەزيدەنت لاۋازىمى - وكىلەتتىلىگى شەكتەۋلى سيمۆولدىق تۇلعا. ول كىمدى كەشىرەتىنىن شەشە الادى جانە زاڭدارعا ۆەتو قۇقىعىن پايدالانا الادى. ءبىراق ول حالىقارالىق قاتىناستاردا ۇكىمەتتىڭ كەلىسىمىمەن عانا وكىلدىك قىزمەتىن اتقارا الادى.

ەستەرىڭىزگە سالا كەتەيىك، گرۋزيادا پرەزيدەنت العاش رەت حالىقتىڭ تىكەلەي داۋىس بەرۋى ارقىلى ەمەس، 300 تاڭداۋشىدان تۇراتىن كوللەدج وتىرىسىندا سايلاندى.

بۇعان دەيىن گرۋزياداعى پرەزيدەنتتىك سايلاۋدا داۋىس بەرۋ قالاي ءوتىپ جاتقانىن جازعان ەدىك.