مىڭ تۇيەدەن قۇرالعان كەرۋەن گيننەستىڭ رەكوردتار كىتابىنا ەندى

استانا. KAZINFORM - الەمدىك جەتىستىك سەرتيفيكاتىن گيننەستىڭ رەكوردتار كىتابىنىڭ وكىلى ريچارد-ۋيليام ستەننينگ تابىستادى، دەپ حابارلايدى الماتى وبلىسىنىڭ اكىمدىگى.

الماتى وبلىسىندا ءبىر وركەشتى مىڭ تۇيەدەن قۇرالعان كەرۋەن رەسمي تۇردە گيننەستىڭ رەكوردتار كىتابىنا ەندى. ءبىر شاقىرىم قاشىقتىقتى ءجۇرىپ وتكەن كەرۋەن 20-قىركۇيەكتە ىلە اۋدانىنىڭ كۇرتى اۋىلىندا ۇيىمداستىرىلعان بولاتىن.

گيننەستىڭ رەكوردتار كىتابىنىڭ وكىلى ريچارد-ۋيليام ستەننينگ قازاقستاندىق جوبانىڭ ەرەكشەلىگىنە ەرەكشە توقتالد.

- بۇل - ايرىقشا جاعداي. وزگە ەلدەردە مۇنداي كەرۋەندەر ءارتۇرلى ادامداردىڭ جانۋارلارىنان قۇرالادى - بىرىندە ءتورت تۇيە، ەكىنشىسىندە ەكى تۇيە بولادى. ال قازاقستاندا مىڭ تۇيەنىڭ ءبارى ءبىر ادامنىڭ يەلىگىندە. بۇل - رەكوردتى شىنىمەن دە ەرەكشە ءارى بىرەگەي ەتەدى. قازاقستان مەنى تاڭعالدىردى، ەندى بۇل ەلگە تۋريست رەتىندە دە كەلگىم كەلەدى، - دەدى ول.

الماتى وبلىسىنىڭ اكىمى مارات سۇلتانعازيەۆ تە بۇل وقيعانىڭ ەل ءۇشىن ماڭىزىن اتاپ ءوتتى.

- رەكوردتىڭ رەسمي تۇردە مويىندالۋى - ءبىزدىڭ ۇلتتىق رۋحىمىز بەن مادەني مۇرامىزعا كورسەتىلگەن ۇلكەن قۇرمەت. مىڭ تۇيەدەن قۇرالعان كەرۋەن حالىقتى بىرىكتىرىپ، قازاق ءداستۇرىنىڭ سيمۆولىنا اينالدى، - دەدى ايماق باسشىسى.

يدەيا اۆتورى ءارى كەرۋەن يەسى، «داۋلەت- بەكەت» ج ش س ديرەكتورى سىدىق داۋلەتوۆ جوبانى دايىنداۋعا جارتى جىل ۋاقىت كەتكەنىن ايتتى.

- تۇيە - ەركىندىككە ۇيرەنگەن جانۋار. مىڭ تۇيەنى بىرگە جيناۋ وڭاي بولعان جوق. ءبىراق ماقسات پەن سەنىم بولسا، مۇمكىن ەمەس دۇنيە جوق. الداعى ۋاقىتتا شۇبات فەستيۆالىن وتكىزۋدى جوسپارلاپ وتىرمىز. حالىققا وسىنداي ءداستۇرىمىزدى جاڭعىرتاتىن شارالار قاجەت، - دەدى ول.

بۇدان بۇرىن قىركۇيەكتە الەمدەگى ەڭ ۇلكەن تۇيە كەرۋەنى الماتى وبلىسى ىلە اۋدانىنىڭ كۇرتى اۋىلدىق وكرۋگىندە ءجۇرىپ وتكەنىن جازعانبىز.