مونبلان تاۋى سوڭعى ەكى جىلدا 2 مەترگە الاسارىپ كەتكەن
ەۋروپاداعى ەڭ ۇلكەن تاۋدىڭ بيىكتىگى 4805,59 مەترگە دەيىن الاساردى. بۇل كورسەتكىش 2021 -جىلمەن سالىستىرعاندا 2,22 مەترگە تومەن.

قازاقپارات بۇل تۋرالى Euronews باسىلىمىنا سىلتەمە جاساپ حابارلايدى.
رەسمي دەرەكتەر بويىنشا، ەندى ونىڭ بيىكتىگى — 4805,59 مەتر.
ياعني 2021 -جىلمەن سالىستىرعاندا 2,22 مەتر تومەن.
«بۇل جاعدايعا جازدا جاۋىن- شاشىن مولشەرىنىڭ ازدىعى اسەر ەتۋى مۇمكىن جانە بۇل قۇبىلىس بۇرىننان بايقالىپ كەلە جاتىر» دەپ اتاپ ءوتتى شامونيدەگى باسپا ءسوز كونفەرەنتسياسىندا جوعارعى ساۆويا گەودەزيا قىزمەتىنىڭ باسشىسى جان دە گارە.
ونىڭ بولجامىنشا، ەكى جىلدان كەيىن مونبلان قايتا بيىكتەۋى ابدەن مۇمكىن.
دەرەكتەردى جيناۋ 2001 -جىلى باستالدى. ونىڭ ماقساتى — تەمپەراتۋرانىڭ جوعارىلاۋى الپىگە قالاي اسەر ەتەتىنىن انىقتاۋ.
قار ءتۇسىپ، ەرىگەنىنە بايلانىستى بيىكتىك وزگەرۋى قالىپتى قۇبىلىس، سول سەبەپتى بولاشاقتا جوعالتقان بيىگىن قالپىنا كەلتىرىپ، ودان دا جوعارىلاي ءتۇسۋى ىقتيمال.
2017 -جىلى تاۋ سىلەمى اۋماعىندا ورنالاسقان ءۇش ەل — فرانسيا، يتاليا مەن شۆەيتساريا ونى UNESCO الەمدىك مۇرا تىزىمىنە ەنگىزۋدى ۇسىندى.
سول كەزدە قۇرلىقتاعى ەڭ بيىك تاۋدىڭ شىڭى 4808,72 مەترگە جەتەتىن.