موپەدتەر ەندى كولىك قۇرالدارىنا تەڭەستىرىلەدى: ولاردى تىركەۋ ءتارتىبى قانداي

استانا. KAZINFORM - قازاقستان رەسپۋبليكاسىنىڭ «جول قوزعالىسى تۋرالى» زاڭىنا ەنگىزىلگەن وزگەرىستەرگە سايكەس، موپەدتەر مەحانيكالىق كولىك قۇرالدارىنا تەڭەستىرىلدى. بۇل تۋرالى استانا قالاسى پوليتسيا دەپارتامەنتى حابارلادى. ەندى موپەد يەلەرى كولىكتەرىن ىشكى ىستەر ورگاندارىندا مىندەتتى تۇردە مەملەكەتتىك تىركەۋدەن وتكىزۋى كەرەك.

جاڭا ەرەجەلەر 2025-جىلدىڭ 5-ساۋىرىنەن باستاپ كۇشىنە ەنەدى. وسى كۇننەن كەيىن تىركەۋسىز، جۇرگىزۋشى كۋالىگىنسىز جانە ساقتاندىرۋ ءپوليسىنسىز موپەدتەردى باسقارۋعا تىيىم سالىنادى.

- زاڭناماعا سايكەس، موپەدتەرگە قوزعالتقىش كولەمى 50 تەكشە سانتيمەتردەن اسپايتىن نەمەسە ەلەكتر قوزعالتقىشى بار، جىلدامدىعى 50 ك م/ساعاتتان جوعارى ەمەس ەكى نەمەسە ءۇش دوڭعالاقتى مەحانيكالىق كولىك قۇرالدارى جاتادى. ولارعا موپەدتەر، سكۋتەرلەر جانە باسقا دا وسىعان ۇقساس قوزعالىس قۇرالدارى كىرەدى، - دەدى استانا قالاسى پ د اكىمشىلىك پوليتسيا باسقارماسىنىڭ باستىعى نۇرلان ۋۆايەۆ.

موپەدتەردى قالاي تىركەۋگە بولادى؟

موپەدتەردى تىركەۋدەن وتكىزۋ ءۇشىن مەنشىك يەسى تۇرعىلىقتى جەرى بويىنشا ارنايى حالىققا قىزمەت كورسەتۋ ورتالىقتارىندا راسىمدەۋ كەرەك.

ول ءۇشىن كەلەسى قۇجاتتار قاجەت:

• جەكە كۋالىك (ەلەكتروندى فورماتتا ۇسىنۋعا بولادى)؛

• تىركەۋ تۋرالى ءوتىنىشتى تولتىرۋ؛

• موپەدتىڭ تەحنيكالىق قۇجاتتارى نەمەسە ونىڭ تەحنيكالىق سيپاتتامالارى تۋرالى مالىمەتتەر؛

• موپەدتى تەحنيكالىق تەكسەرۋدەن وتكىزۋ؛

• مەملەكەتتىك الىمداردى تولەۋ:

* تىركەۋ ءۇشىن - 983 تەڭگە (0,25 ا ە ك)؛ * تىركەۋ كۋالىگىن بەرۋ ءۇشىن - 4915 تەڭگە (1,25 ا ە ك)؛ * مەملەكەتتىك ءنومىردى بەرۋ ءۇشىن - 5505 تەڭگە (1,4 ا ە ك).

موپەدتى باسقارۋ ءۇشىن قانداي جۇرگىزۋشى كۋالىگى قاجەت؟

موپەدتى باسقارۋ ءۇشىن كەلەسى ساناتتاعى جۇرگىزۋشى كۋالىگىنىڭ ءبىرى قاجەت: A1 - 16 جاستان باستاپ، A جانە B - 18 جاستان باستاپ. سونداي-اق، جۇرگىزۋشىلەر كولىك قۇرالىن تەحنيكالىق تەكسەرۋدەن وتكىزىپ، ازاماتتىق-قۇقىقتىق جاۋاپكەرشىلىكتى ساقتاندىرۋ ءپوليسىن راسىمدەۋگە مىندەتتى.

- 2025-جىلدىڭ 5-ساۋىرىنەن باستاپ تىركەلمەگەن موپەدتەردى باسقارعان نەمەسە جۇرگىزۋشى كۋالىگى جوق تۇلعالار اكىمشىلىك جاۋاپكەرشىلىككە تارتىلادى. پوليتسيا دەپارتامەنتى موپەد يەلەرىنە تىركەۋدى كەيىنگە قالدىرماي، جۇرگىزۋشى كۋالىگىن الدىن الا الىپ قويۋدى ۇسىنادى، - دەپ اتاپ ءوتتى استانا قالاسى پد اكىمشىلىك پوليتسيا باسقارماسىنىڭ ءبولىم باسشىسى باۋىرجان توقجۇمانوۆ.

ايتا كەتەلىك 5-ساۋىردەن كەيىن موپەدتەرىن تىركەمەگەندەرگە قانداي جاۋاپكەرشىلىك كوزدەلگەنى تۋرالى جانە موپەد يەلەرى ەندى A1 ساناتىنداعى جۇرگىزۋشى كۋالىگىن الۋعا مىندەتتەلگەنى تۋرالى جازعان ەدىك.