موڭعوليادا قوي قىرقۋ بويىنشا الەمدىك سايىس وتپەك
استانا. KAZINFORM - موڭعوليادا العاش رەت «التىن قايشى-2025» اتتى قوي قىرقۋ بويىنشا حالىقارالىق بايقاۋ وتەدى، دەپ حابارلايدى مونتسامە.
ءىس-شارانىڭ نەگىزگى ماقساتى - مال شارۋاشىلىعى سالاسىنا وزىق ادىستەردى، جابدىقتار مەن تەحنولوگيالاردى ەنگىزۋ، سونداي-اق جانۋارلاردان الىناتىن شيكىزاتتى دايىنداۋ ساپاسىن ارتتىرۋ.
بايقاۋ موڭعوليا پرەزيدەنتى ۋحنااگين حۋرەلسۇحتىڭ باستاماسىمەن 2025-جىلعى 20-21-ماۋسىم ارالىعىندا وتەدى.
قوي قىرقۋ بويىنشا حالىقارالىق بايقاۋلار الەمنىڭ ءارتۇرلى ەلدەرىندە 1961-جىلدان بەرى ۇيىمداستىرىلىپ كەلەدى. ال العاشقى الەم چەمپيوناتى 1977-جىلى وتكەن جانە سودان بەرى ءار ەكى-ءۇش جىل سايىن تۇراقتى تۇردە وتكىزىلىپ كەلەدى.
حالىقارالىق دەڭگەيدە بايقاۋ ەكى سانات بويىنشا وتەدى: «ءجۇن پرەستەۋشى» جانە «ءجۇن سۇرىپتاۋشى». موڭعوليادا كاسىبي قوي قىرقۋشىلاردى دايىنداۋ 2022-جىلى باستالعان. بۇگىنگى تاڭدا بۇل سالادا 28 ادام كاسىبي بىلىكتىلىككە يە بولدى.
بۇعان دەيىن حابارلانعانداي، ۇلان-باتىردىڭ ورتالىق الاڭىندا موڭعوليانىڭ ەگىزدەر قاۋىمداستىعىنىڭ 35 جىلدىعىنا ارنالعان مەرەكەلىك شەرۋ ءوتتى.
