موڭعوليادا قاسىم-جومارت توقايەۆتى سالتاناتتى قارسى الۋ ءراسىمى ءوتتى
ۋلانباتىر. KAZINFORM - موڭعولياعا مەملەكەتتىك ساپارمەن كەلگەن قاسىم-جومارت توقايەۆتى سالتاناتتى تۇردە قارسى الۋ ءراسىمى ءوتتى، دەپ حابارلايدىۆ اقوردا
ۇكىمەت ءۇيى الدىنداعى سۋحە-باتىر الاڭىندا قۇرمەت قاراۋىلى جانە ساۋىت كيگەن سالت اتتى موڭعول جاۋىنگەرلەرى ساپ تۇزەپ تۇردى. قۇرمەت قاراۋىلى باستىعىنىڭ راپورتىنان كەيىن ەكى ەلدىڭ مەملەكەتتىك ءانۇراندارى شىرقالدى، مەملەكەتتەر باسشىلارى ءبىر-بىرىنە رەسمي دەلەگاتسيا مۇشەلەرىن تانىستىردى.
سودان سوڭ قاسىم-جومارت توقايەۆ قۇرمەتتى قوناقتار كىتابىنا قولتاڭبا قالدىردى.
سالتاناتتى راسىمنەن كەيىن پرەزيدەنتتەر كەلىسسوز زالىنا باردى.
ساپار اياسىندا جوعارى دەڭگەيدەگى كەلىسسوزدەر، سونداي-اق ءبىرقاتار ماڭىزدى قۇجاتقا قول قويۋ جوسپارلانعان.
وسىعان دەيىن 28-29-قازان كۇندەرى پرەزيدەنت قاسىم-جومارت توقايەۆ موڭعولياعا مەملەكەتتىك ساپارمەن باراتىنىن حابارلادىق.
مەملەكەت باسشىسى پرەزيدەنت ۋحنااگين حۋرەلسۋحپەن كەلىسسوز جۇرگىزەدى. سونداي-اق موڭعوليانىڭ ۇلى مەملەكەتتىك حۋرالىنىڭ ءتوراعاسى داشزەگۆين امارباياسگالانمەن جانە پرەمەر-مينيستر لۋۆساننامسراين ويۋۋن-ەردەنەمەن كەزدەسەدى.
مىڭداعان جىلدارعا سوزىلعان تاريحي بايلانىسى بار ەكى حالىقتىڭ قازىر ءتۇرلى سالاداعى قارىم-قاتىناسى جاقسى دەڭگەيدە. ەكى ەل باسشىسىنىڭ كەزەكتى كەزدەسۋىندە ساياسي جانە ەكونوميكالىق بايلانىستاردى نىعايتۋ جايى تالقىلانىپ، ءبىرقاتار كەلىسسوز ءوتۋى مۇمكىن ەكەنى حابارلاندى.
