موڭعوليادا الەمدەگى قار بارىسىنىڭ 20 پايىزى مەكەندەيدى

ۇلان- باتىر. KAZINFORM - موڭعوليادا 1000 عا جۋىق قار بارىسى بار، ولار موڭعول التايىن، گوۆ- التاي ايماعىن، حانگاي مەن سايان تاۋلارىن قامتيتىن 328 مىڭ شارشى شاقىرىمداي اۋماقتا مەكەندەيدى. دەمەك، دۇنيەجۇزىندەگى بارىستاردىڭ جالپى سانىنىڭ %20 دان استامى موڭعوليادا ءومىر سۇرەدى. بۇل تۋرالى مونتسامە اگەنتتىگى جازدى.

حالىقارالىق قار بارىسى كۇنىنە وراي دۇنيە جۇزىندە ءتۇرلى كورمەلەر، كونفەرەنسيالار، سەمينارلار ءوتىپ، دەرەكتى فيلمدەر كورسەتىلۋەدى. سپورت پەن ونەر الەمىنىڭ تانىمال تۇلعالارى سيرەك كەزدەسەتىن اڭ ءتۇرىن قورعاۋعا جانە ساقتاۋعا شاقىرادى.

بۇل ءىس- شارالار بارىستى قورعاۋ جانە ونىڭ تابيعي ورتاسىن ساقتاۋ قاجەتتىلىگىنە نازار اۋدارۋعا باعىتتالعان.

ال، بۇعان دەيىن قازاقستان اۋماعىندا تىرشىلىك ەتەتىن ىلبىستەردىڭ سانى جىلىنا 5-6 باسقا كوبەيىپ كەلە جاتقانىن جازعان بولاتىنبىز. مۇنى سامارقاندا ءوتىپ جاتقان ۇنەمى قونىس اۋدارىپ تىرشىلىك ەتەتىن جابايى جانۋار تۇرلەرىن ساقتاۋ كونۆەنسياسىنىڭ كەزەكتى وتىرىسى (COP 14) اياسىندا زوولوگيا ينستيتۋتىنا قاراستى قار بارىسىن باقىلاۋ ورتالىعىنىڭ باسشىسى الەكسەي گراچيەۆ ايتقان ەدى.