موڭعوليا پرەزيدەنتى «التىن قىران» وردەنىمەن ماراپاتتالدى

- بۇگىن مەن موڭعوليا پرەزيدەنتى، قادىرلى حۋرەلسۇح مىرزانى ەكى مەملەكەت اراسىنداعى ىنتىماقتاستىقتى نىعايتۋعا جانە قازاق-موڭعول سان قىرلى بايلانىستارىن ىلگەرىلەتۋگە قوسقان ەلەۋلى ۇلەسى ءۇشىن قازاقستاننىڭ ەڭ جوعارى مەملەكەتتىك ناگراداسى «التىن قىران» وردەنىمەن ماراپاتتادىم. بۇل مىزعىماس باۋىرلاستىعىمىزدىڭ، حالىقتارىمىزدىڭ كەلەشەگى جولىنداعى ورتاق ۇمتىلىسىمىزدىڭ جارقىن بەلگىسى، - دەدى قاسىم-جومارت توقايەۆ.

پرەزيدەنت موڭعوليا باسشىسىنىڭ قازاقستانعا ساپارى وتە ناتيجەلى ءوتىپ جاتقانىن باسا ايتتى.

- قازاقستان مەن موڭعوليانىڭ ايماقتىق جانە جاھاندىق دەڭگەيدەگى كوپتەگەن وزەكتى ماسەلە بويىنشا ۇستانىمدارى ۇقساس. ەرتەڭ وتەتىن ەكولوگيالىق سامميت سونىڭ ايقىن كورىنىسى. ءبىز موڭعوليامەن ىنتىماقتاستىقتى دامىتۋعا ايرىقشا كوڭىل بولەمىز. حالىقارالىق ۇيىمدار اياسىندا ءبىز ءبىر-بىرىمىزگە ۇنەمى قولداۋ كورسەتىپ كەلەمىز. بۇل ەلدەرىمىزدىڭ ستراتەگيالىق سەرىكتەستىكتى جانە ءوزارا سەنىمىنىڭ ناقتى كورىنىسى ەكەنى انىق. مەن مۇنى جوعارى باعالايمىن، - دەدى مەملەكەت باسشىسى.

بۇعان دەيىن قاسىم-جومارت توقايەۆ اقوردادا موڭعوليا پرەزيدەنتىن قارسى العانىن جازعان ەدىك.