موبيلدى تولەم: اۋدارىم قابىلداۋشى مەن اۋدارىم جولداۋشى نەنى ءبىلۋى كەرەك

  Kazinform وقىرمان نازارىنا ءموبيلدى اۋدارىمداردى سالىق وربيتاسىنا شىعارۋ شارالارىنىڭ كىمدەرگە قانداي قاتىسى بولاتىنى تۋرالى شولۋ ۇسىنادى.

«100 اۋدارىم» قاعيداتى

2024-جىلى جالپىعا بىردەي دەكلاراتسيانىڭ ءۇشىنشى كەزەڭى باستالدى. بۇل كەزەڭدە بۇكىل جەكە كاسىپكەرلەر مەن زاڭدى تۇلعالاردىڭ يەلەرى، اتالعان جانداردىڭ جۇبايلارى كىرىس دەكلاراتسياسىن تاپسىرادى. ەسكە سالساق، بۇعان دەيىن اۋەلى مەملەكەتتىك قىزمەتكەرلەر مەن ولاردىڭ جۇبايلارى، ودان كەيىن كۆازيمەملەكەتتىك سەكتور قىزمەتشىلەرى مەن جۇبايلارى كىرىس دەكلاراتسياسىن تاپسىرا باستاعان ەدى.

ەندىگى كەزەك جەكە كاسىپكەرلەر مەن زاڭدى تۇلعالاردىڭ (جەكە كاسىپكەرلىك، ج ش س) يەلەرى مەن جۇبايلارىنا كەلىپ وتىر. ولار 15-قىركۇيەككە دەيىن يەلىگىندە قانداي مۇلىك بار ەكەنىن، قايدان قانداي تابىس الاتىنىن №250 قالىپتاعى دەكلاراتسيادا كورسەتۋگە ءتيىس. اتالعان ساناتتاعى ازاماتتاردىڭ بانكتەر ارقىلى جۇرگىزگەن قارجىلىق وپەراتسيالارى نازارعا الىنادى. ءموبيلدى «100 اۋدارىم» قاعيداتىنىڭ جالپىعا بىردەي كىرىس دەكلاراتسياسىمەن تۇيىسەتىن جەرى وسى تۇس.

2024 -جىلدىڭ 15-قىركۇيەگىندە جەكە كاسىپكەرلەر مەن جۇبايى تاپسىرعان دەكلاراتسيالار قابىلداۋ اياقتالادى. ال 2025 -جىلى ەلدەگى بۇكىل بانكتەر 2024 -جىلى جەكە كاسىپكەرلەر مەن زاڭدى تۇلعا يەلەرى ىسكە اسىرعان قارجىلىق وپەراتسيالار تۋرالى مالىمەت ۇسىنادى. وسى كەزدە ءۇش اي قاتارىنان بىرنەشە تۇلعادان 100 دەن استام اۋدارىم قابىلداعان دەكلاراتسيا يەلەرى ول اۋدارىمداردىڭ كاسىپكەرلىكپەن بايلانىسى جوق ەكەنىن دالەلدەۋ كەرەك بولادى.

قاراپايىمداپ ايتساق، قارجى مينيسترلىگى ءبىر ايدىڭ ىشىندە بىرنەشە ازاماتتان 100 دەن استام اۋدارىم قابىلداۋ جاسىرىن كاسىپكەرلىكتىڭ ءبىر بەلگىسى دەگەن ۇستانىم قولدانباقشى. بۇل جەردە 100 اۋدارىم مەجەسى ءۇش اي قاتارىنان قايتالانۋى شارت.

وسى ارقىلى قانداي دا ءبىر كاسىپكەرلىك قىزمەتپەن اينالىسقانىمەن، باقىلاۋ-كاسسا ماشيناسى جوق، پوست- تەرمينال ۇستامايتىن، QR- كود پايدالانبايتىن كاسىپكەرلەردەن سالىق ءوندىرۋ ماقساتى كوزدەلىپ وتىر.

ارنايى كاسىپكەرلىك شوت

قولما-قول اقشاسىز تولەم پايدا بولعان ساتتەن باستاپ زاڭدى تۇردە جۇمىس ىستەۋگە تالپىنعان كاسىپكەرلەر ارنايى كاسىپكەرلىك شوت اشقىزعان. QR كود ارقىلى، موبيلدى تولەم (كوممۋنالدىق تاريفتەردى بانك قوسىمشاسىنان تولەۋ - رەد. ) ارقىلى قابىلدانعان اقشا وسى شوتقا تۇسەدى. مۇنداي كاسىپكەرلەرگە «100 اۋدارىم» قاعيداتىنىڭ قاتىسى جوق.

ءبىراق بۇل جەكە شوتتى كوممەرتسيالىق تولەم قابىلداۋعا پايدالانۋعا بولادى دەگەن ءسوز ەمەس. ءتىپتى جەكە شوتقا جاسالعان اۋدارىمعا تۇبىرتەك شىعارعان كۇننىڭ وزىندە بۇل زاڭسىز بولىپ ەسەپتەلەدى.

اۋدارىمداردى قاداعالاۋ قوسىلعان قۇن سالىعىنىڭ قۇرىعى ەمەس پە؟

قازىر جەكە كاسىپكەر رەتىندە تىركەلگەن شاعىن بيزنەس نىساندارى 1-4 پايىز ارالىعىندا، مينيمالدى مولشەرلەمە بويىنشا سالىق تولەپ وتىر. 29-جەلتوقسانداعى ۇكىمەت قاۋلىسىمەن بولشەك ساۋدا سالىعىنىڭ قاتارى كەڭەيتىلدى. بۇعان دەيىن 190 قىزمەت ءتۇرى تولەنسە، ەندى 364 قىزمەت تۇرىنە وسى سالىق ەنگىزىلدى، ياعني بۇلاردىڭ ءبارى قوسىلعان قۇن سالىعىن تولەمەيدى. اينالىمى 2 ميلليارد تەڭگەدەن اسپايتىن كاسىپكەرلەر اينالىمىنىڭ 4 پايىزى كولەمىندە عانا سالىق تولەيدى. بۇل كۇندىك اينالىمى 5 ميلليون تەڭگەدەن اسپايتىن كاسىپكەرلەر دەۋگە بولادى. ءبىراق اكتسيزدىك تاۋار ساتاتىن، قىزمەتىنە ءتۇرلى ورگانداردىڭ رۇقساتىن، سەرتيفيكاتىن الۋدى قاجەت ەتەتىن قىزمەت تۇرلەرى اينالىمىنا قاراماستان، بۇل قاتارعا كىرمەيدى. قاراعاندى جانە قىزىلوردا وبلىستارىنىڭ ءماسليحاتتارى ىشكى شەشىم ارقىلى ونىڭ ەكى ەسە تومەندەتىپ، 2 پايىزعا ءتۇسىردى. دەمەك، بۇل ەكى ءوڭىردىڭ اۋماعىندا جۇمىس ىستەيتىن جەكە كاسىپكەرلەردىڭ جىلدىق اينالىمى 2 ميلليارد تەڭگەدەن اسپاسا، 2 پايىزدىق سالىق تولەيدى. استانا ءماسليحاتى 3 پايىزدىق مەجە قويىپ وتىر، ياعني مەملەكەت جەرگىلىكتى ءماسليحاتتارعا سالىقتىڭ بۇل مولشەرلەمەسىن ءتۇسىرىپ تاعايىنداۋعا مۇمكىندىك بەرگەن.

كاسسادا نەمەسە تاكسيدە قولما- قول اقشا تالاپ ەتسە نە ىستەۋ كەرەك؟

جەرگىلىكتى سالىق ورگانىنا جۇگىنۋ كەرەك. سالىق ورگانى ونداي شاعىمداردىڭ مالىمەتىن جيناستىرىپ، تەكسەرۋ ۇيىمداستىرادى. بۇل جەردە ءبىر ادامنان شاعىم تۇسكەنى ءۇشىن كاسىپكەردى باس سالىپ تەكسەرە كەتپەيدى. باسقا دا ادامداردان ناقتى وسى كاسىپكەردىڭ، ساتۋشىنىڭ، دۇكەننىڭ ۇستىنەن وسىنداي ماندەگى شاعىم ءتۇسۋىن كۇتەدى. سولاردى جيناقتاپ بارىپ قانا رەيدكە شىعادى.

تۋىسقاندار اراسىنداعى اۋدارىمداردىڭ سوماسىنا شەكتەۋ قويىلا ما؟

موبيلدى اۋدارىمداردىڭ سوماسىنا قاراپ كاسىپكەرلىك بەلگىلەرىن انىقتاۋ تەتىگى زاڭنامادا قاراستىرىلماعان. دەمەك، تۋىسقاندار مەن تانىستار اراسىنداعى كوممەرتسيالىق ەمەس اۋدارىمداردىڭ سوماسىنا سالىق ورگاندارى ەشقانداي شەكتەۋ قويا المايدى. سايكەسىنشە، جەكە شوتقا ءبىر ايدىڭ ىشىندە جولدانعان اۋدارىم سانى ءۇش اي قاتارىنان 100 دەن اسپاسا، سوماسىنا بولا مونيتورينگكە الىنبايدى.

تاكسي جۇرگىزۋشىلەرى نەنى ءبىلۋ كەرەك؟

تاكسي جۇرگىزۋشىلەرىنە ارنايى سالىق رەجيمى بار. ول رەجيمگە ەنۋ ءۇشىن تاكسي جۇرگىزۋشىسىنە جەكە كاسىپكەر رەتىندە تىركەلۋ كەرەك. سوندا تابىسىنان 1 پايىز سالىق تولەيدى. پاتەنت الىپ تا، 1 پايىز سالىق تولەي الادى.

ادام تاسىپ نەمەسە ونلاين تاپسىرىس ورىنداپ اقشا تاباتىن ادامدار سالىق جاعىنا باس اۋىرتقىسى كەلمەسە، «سالىق اگەنتى» تەتىگىن پايدالانا الادى. جاڭا سالىق كودەكسىندە وسىنداي نورما قارالىپ جاتىر، ياعني «ياندەكس- تاكسي» نەمەسە «ياندەكس- جەتكىزۋ» سياقتى وپەراتورلار ءوزى جۇمىس بەرگەن تاسىمالداۋشىلاردىڭ سالىق اگەنتى رەتىندە سالىق ورگاندارىمەن جۇمىس ىستەيدى، تاسىمالداۋشىلار ءۇشىن بيۋدجەتكە سالىق اۋدارىپ وتىرادى. ونىڭ شىعىنى قىزمەت باعاسىنا قوسىلۋى مۇمكىن.

تاكسي جۇرگىزۋشىسىنىڭ جىلدىق اينالىمى 12 ميلليون تەڭگەدەن اسپاسا، سونىڭ 1 پايىزىن عانا سالىق رەتىندە تولەيدى.

قايىرىمدىلىق اۋدارىمدارىنىڭ سانىنا شەكتەۋ بار ما؟

قايىرىمدىلىق ماقساتتاعى اۋدارىمدار ارنايى شوتتار ارقىلى ءوتۋى كەرەك. ەگەر قايىرىمدىلىق قور اقشا جيناپ جاتقان بولسا زاڭدى تۇلعانىڭ اتىنا شوت اشۋ كەرەك.

قيىندىققا تاپ بولعان ادام جاقىنىنىڭ ەمىنە نەمەسە تابيعي اپات سالدارىنان ءۇيسىز قالعانى ءۇشىن جەكە شوتىنا قايىرىمدىلىق اۋدارىمدار قابىلداعان بولسا، سالىق ورگاندارىنىڭ نازارىنا ىلىگۋى مۇمكىن.

ءبىراق تەكسەرۋ كەزىندە بانك وكىلدەرىنە نەمەسە كەيىن سالىق ورگاندارىنا ءمان- جايدى ءتۇسىندىرىپ، كاسىپكەرلىك قىزمەتتەن كىرىس تابۋ ەمەس ەكەنىن دالەلدەيدى. ناۋقاسقا اقشا جيناعان بولسا، مەديتسينالىق قۇجاتتارى كەرەك. ال ءۇيسىز قالعان بولسا، ول تۋرالى اكت بولۋى شارت. اقشانىڭ وسى ماقساتتارعا جۇمسالعانىن تۇبىرتەكتەر ارقىلى دالەلدەيدى.

قايىرىمدىلىق ۇرانىمەن اقشا جينايتىن بلوگەرلەردىڭ اۋدارىمدارى قالاي قاداعالانادى؟

تەك بلوگەرلەر عانا ەمەس، باسقا ازاماتتار دا قايىرىمدىلىق ماقساتپەن موبيلدى اۋدارىمدار قابىلداۋى مۇمكىن. ونداي ءموبيلدى اۋدارىمدار سانى 100 دەن اسسا، سالىق ورگاندارىنا كەلەسى جىلدا ءتيىستى مالىمەت تۇسەدى. سونىڭ نەگىزىندە سالىق ورگانى شوت يەسىنە ارنايى حابارلاما جىبەرەدى. وسىدان كەيىن شوت يەسى سالىق ورگاندارىنا اۋدارىمنىڭ قايىرىمدىلىق ماقساتقا جۇمسالعانىن تۇبىرتەك پەن انىقتاما، اكت سياقتى قۇجاتتاردى كورسەتۋ ارقىلى دالەلدەيدى. مۇنداي جاعدايدا وعان ادامعا سالىق مىندەتى قويىلمايدى.

كومەك كەرەك بولسا، كىمگە جۇگىنۋ كەرەك؟

- 1414 نومىرىنە

- Telegram چاتقا

- مەملەكەتتىك كىرىستەر باسقارمالارىنىڭ «كونسۋلتاتيۆتىك ورتالىقتارىنا» . ​