موبيلدى اۋدارىمداردى تەكسەرۋ: مينيسترلىك ماڭىزدى مالىمدەمە جاسادى
استانا. KAZINFORM - قازاقستاندا موبيلدى اۋدارىمداردى تەكسەرۋدىڭ وڭتايلى جولى ىزدەستىرىلىپ جاتىر. بۇل باعىتتا قارجى مينيسترلىگى جاڭا باستاما كوتەردى.
قازىر بانكتەر ءۇش اي بويى ءارتۇرلى ادامنان 100 دەن اسا اۋدارىم العان قازاقستاندىقتار تۋرالى سالىق ورگاندارىنا اقپارات بەرۋى قاجەت. تاعى ءبىر ماڭىزدى شارت: اقشا تۇسكەن شوت كاسىپكەرلىك قىزمەتكە ارنالماۋعا ءتيىس.
جاڭا باستاما تۋرالى
ەندى قارجى مينيسترلىگى مەن ۇلتتىق بانكپەن بىرلەسىپ، جاڭا وزگەرىستەر ەنگىزۋى مۇمكىن.
«قولدانىستاعى شارتتارعا شەكتى سوما قوسىلادى، ياعني بۇل دەگەنىمىز تۇسكەن موبيلدى اۋدارىمدار 3 كۇنتىزبەلىك اي ىشىندە 12 ا ە ك- تەن (1020000 تەڭگە) اسۋعا ءتيىس»، - دەپ جازىلعان حابارلامادا.
وسىلايشا، ەكىنشى دەڭگەيلى بانكتەرگە 3 اي ىشىندە 1,02 ميلليون تەڭگەدەن از موبيلدى اۋدارىم تۇسكەن قازاقستاندىقتار تۋرالى اقپاراتتى سالىق ورگاندارىنا بەرمەۋگە رۇقسات ەتىلەدى. موبيلدى اۋدارىمداردىڭ سانى ءۇش اي بويى 100 دەن كوپ بولعان جاعدايدا دا رۇقسات ەتىلەدى.
قارجى ءمينيسترىنىڭ ءتيىستى بۇيرىعى قازىر ۇلتتىق بانكتىڭ قاراۋىندا. ياعني شەشىم ءالى قابىلدانعان جوق.
ەسكە سالايىق، بۇعان دەيىن ۇلتتىق بانك ءتوراعاسىنىڭ ورىنباسارى بەرىك شولپانقۇلوۆ قازاقستاندا ايىنا 255 مىڭ تەڭگەدەن باستالاتىن موبيلدى اۋدارىمداردى باقىلاۋ تۋرالى سۇراققا جاۋاپ بەردى. ول بۇل ماسەلە قىزۋ تالقىلانىپ جاتقانىن جەتكىزدى.
