موبيلدى اۋدارىمداردىڭ شەگىن 255 مىڭنان 1 ميلليون تەڭگەگە كوتەرۋ كەرەك - دەپۋتات

استانا. KAZINFORM - ءماجىلىس دەپۋتاتى ازات پەرۋاشيەۆ پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارينگە جولداعان ساۋالىندا سالىق ورگاندارىن موبيلدى اۋدارىمداردى قاداعالاۋ ساياساتىن قايتا قاراۋعا شاقىردى.

دەپۋتات موبيلدى اۋدارىمداردى قاداعالاۋدىڭ قازىر ۇسىنىلىپ جۇرگەن نۇسقاسى تۇركيانىڭ قاتەلىكتەرىن قايتالاتۋى مۇمكىن ەكەنىن ايتادى.

- ولجاس بايدىلدينوۆ سياقتى ساراپشىلار قازىرگى ۇسىنىلىپ وتىرعان ءتاسىل تۇركياداعىداي ۇلتتىق ۆاليۋتانىڭ قوسار باعامىن تۋىنداتۋى مۇمكىن ەكەنىن ايتىپ ءجۇر. بۇل ەلدە قولما-قول ەمەس اقشا قولما-قول اقشادان 10 پايىز قىمبات. بۇل ونداعى سۇمدىق قارقىنمەن كەلە جاتقان ينفلياتسيانىڭ ءبىر كوزى بولىپ وتىر، - دەدى ازات پەرۋاشيەۆ.

سونداي-اق ول بۇل ىستە الەمدەگى تابىستى تاجىريبەلەردى باسشىلىققا الۋ كەرەك دەگەن وي ايتتى.

- مىسالى، كورشىلەس رەسەيدە كۇن سايىن 30 دان ارتىق اۋدارىم قابىلدايتىن تۇلعالار عانا باقىلاۋعا الىنادى. ونىڭ وزىندە ءار تولەمنىڭ مولشەرى 1000 رۋبلدەن ارتىق، مۇنداي تولەمدەردىڭ ءبىر ايداعى جالپى سوماسى 1 ميلليون رۋبلدەن كوپ بولۋى كەرەك. بۇل ءبىزدىڭ ۆاليۋتامەن العاندا 5,5 ميلليون تەڭگەدەن ارتىق دەگەن ءسوز. ال بىزدە جالپى سوماسى 255 مىڭ تەڭگەدەن اساتىن ەڭ ۇساق تولەمدەردىڭ ءوزى مونيتورينگكە الىنايىن دەپ تۇر. ىرگەدەگى رەسەيدىڭ مولشەرلى شەگىنەن 20 ەسە از دەگەن ءسوز. قاجەتسىز اقپاراتتىڭ مۇنشا كولەمى كىمگە، نە ءۇشىن كەرەك، - دەپ سۇرادى ول.

«اقجول» پارتياسى مونيتورينگ جۇرگىزۋگە جاتاتىن تولەمنىڭ ەڭ تومەنگى شەگىن 2000 نان 5000 عا دەيىن كوتەرۋدى ۇسىنىپ وتىر.

- ءبىر ايداعى اۋدارىمداردىڭ جالپى سوماسىنا بەلگىلەنگەن 255 مىڭ تەڭگەلىك شەك ءبىزدىڭ احۋالدا اقىلعا سىيمايتىن مولشەر دەپ ەسەپتەيمىز. تولەمدەردىڭ سوماسىن كاسىپكەرلەردىڭ تازا پايداسى دەپ قاراۋعا بولمايدى. ءىس جۇزىندە شاعىن بيزنەستىڭ تازا پايداسى 15-20 پايىزدان اسپايدى. سونداي 255 مىڭ تەڭگەنىڭ اينالىمىنان كورەتىن كىرىسى 50-60 مىڭ تەڭگەنىڭ اينالاسىندا عانا. ياعني، ەڭ تومەنگى ايلىق مولشەرىنەن دە تومەن. كاسىپكەردىڭ تازا پايداسى 255 مىڭ تەڭگەدەن اسۋ ءۇشىن اينالىم 1 ميلليون تەڭگەدەن اسۋى كەرەك. وسىعان بايلانىستى «اقجول» پارتياسى ايىنا 1 ميلليون تەڭگەدەن اسقان موبيلدى اۋدارىم قابىلداعاندارعا عانا مونيتورينگ جۇرگىزۋدى ۇسىنادى، - دەدى دەپۋتات.

ايتا كەتەيىك، ءماجىلىستىڭ جالپى وتىرىسىندا سىبايلاس جەمقورلىققا قارسى ءىس-قيمىل ماسەلەلەرى جونىندەگى زاڭ جوباسى تالقىلانىپ جاتىر.