موبيلدى اۋدارىمدار: جاسىرىن تابىس ەرتەلى-كەش انىقتالادى

استانا. KAZINFORM - مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باس ساراپشىسى ەرسايىن كوپتىلەۋ ۇلى موبيلدى اۋدارىمداردى باقىلاۋدا 100 ادام مەجەسى قالاي بەلگىلەنگەنىن ءتۇسىندىردى.

мобильді аударым
Коллаж: Kazinform

− وسى ولشەمشارتتى بەلگىلەگەندە ءبىر اي مەرزىمىن قويۋ دۇرىس ەمەس دەپ ەسەپتەدىك، سەبەبى ءبىر ايدا 100 ءتۇرلى ادامنان موبيلدى اۋدارىم الۋ مۇمكىندىگى كوبىرەك. ويتكەنى توي-تومالاق بار، باسقا دا شارالار بار. ال ءۇش اي قاتارىنان اۋدارىم تۇسسە، بۇل ناقتى كاسىپكەرلىكتىڭ بەلگىسى بولا الادى. 30-40 ادام دەسەك تە، كاسىپكەرلىككە قاتىسى جوق جەكە تۇلعالاردىڭ ءىلىنىپ كەتۋى مۇمكىن ەدى. سوندىقتان 100 مەجەسى كاسىپكەرلەردى انىقتاۋعا مۇمكىندىك بەرەدى دەپ ەسەپتەدىك، − دەدى ەرسايىن كوپتىلەۋ ۇلى اگەنتتىكتىڭ «Bizdin orta» پودكاستىندا.

بۇل رەتتە اۋدارىمدار سانى جۇزگە جەتپەي، 99 اۋدارىم عانا بولسا، تەكسەرۋگە ىلىنبەيدى. سپيكەر كەي كاسىپكەرلەر ولشەمشارتتان اينالىپ ءوتۋ جولدارىن قاراستىرۋى مۇمكىن ەكەنىن مويىندايدى.

− ەگەر كاسىپكەرلەر ولشەمشارتتان اينالىپ ءوتۋ جولدارىن تاۋىپ جاتسا، دەمەك ءبىز دە كاسىپكەرلەردى انىقتاۋ مۇمكىندىگىن قايتا قاراستىرامىز. بۇل باعىتتا جۇمىسىمىزدى ۇزدىكسىز جۇرگىزەمىز +++ كىرىس ورگاندارى جاسىرىن تابىستى ەرتەلى-كەش انىقتايدى، بىزدە ەسكىرۋ مەرزىمى - 3 جىل. سوندىقتان كاسىپكەرلەرگە ءوز ىسىنە جاۋاپكەرشىلىكپەن قاراۋىن سۇرايمىز، − دەيدى سپيكەر.

كوميتەت وكىلى قايتادان قولما-قول قاراجاتقا كوشكەن كاسىپكەرلەرگە اكىمشىلىك شارا تۋرالى ەسكەرتتى.

− ەگەر ساتۋشى ءسىزدىڭ كارتامەن تولەۋىڭىزگە شەكتەۋ قويسا، مەملەكەتتىك كىرىستەر ورگاندارىنا جۇگىنۋگە بولدى. العاشىندا كاسىپكەرگە ەسكەرتۋ جاسالادى، ەگەر ول قايتالانسا - 40 ا ە ك ايىپپۇل سالىنادى. بۇل 157 مىڭ تەڭگە، - دەپ ءتۇسىندىردى ە. كوپتىلەۋ ۇلى.

ايتا كەتەيىك، جەكە كاسىپكەر رەتىندە تىركەلمەي كاسىپ جۇرگىزگەندەرگە 15 ا ە ك ايىپپۇل (58980 تەڭگە) اكىمشىلىك شارا كوزدەلگەن.

مەملەكەتتىك كىرىستەر كوميتەتى موبيلدى اۋدارىم بويىنشا قالاعان ۋاقىتىندا كەز كەلگەن تۇلعانىڭ شوتىن تەكسەرە المايدى.

سوڭعى جاڭالىقتار