قازاقستان مەكتەپتەرىندە ەلەكتروندى كىتاپحانا جۇيەسى ەنگىزىلە باستادى
ەل مەكتەپتەرىندە كىتاپحانا قورىن تولىق قامتاماسىز ەتەتىن «Qazaq mura» بىرەگەي جۇيەسى ىسكە قوسىلدى. بۇل - وقۋشىلاردىڭ كىتاپ وقۋ قۇزىرەتتىلىگىن قالىپتاستىرۋعا مۇمكىندىك بەرەتىن جاڭا باعىت. جۇيە اسىرەسە ادەبيەتكە قولى جەتە بەرمەيتىن ايماقتارداعى كىتاپحانا جۇمىسىن ءبىرشاما وڭتايلاندىرماق. بۇل تۋرالى پلاتفورمانى ازىرلەۋشىلەر توبىنىڭ جەتەكشىسى مۇقاتاي مالىك ايتتى، دەپ حابارلايدى Kazinform.
ايتۋىنشا، پلاتفورما ۇلتتىق كىتاپ پالاتاسىمەن ينتەگراتسيالانعان. ول اۋقىمدى كىتاپ قورىنا تەگىن ءارى شەكتەۋسىز قول جەتكىزۋگە مۇمكىندىك بەرىپ قانا قويماي، بارلىق مەكتەپتەردەن اقپارات جيناپ، ناقتى دەرەكتى دە ۇسىنا الادى.
«سيفرلىق كىتاپحانا جۇيەسىن دايىنداۋعا 3 جىلدان استام ۋاقىت جۇمسالدى. كىتاپحانا سالاسىن سيفرلاندىرۋ قازىرگى ءبىلىم بەرۋدەگى زاماناۋي باعىت. بۇگىنگى تاڭدا ەلىمىزدە كىتاپحانا قورى تۋرالى تولىق اقپارات جوق. سوندىقتان قازاقستاننىڭ مەكتەپ كىتاپحانالارىنىڭ جۇمىسىن سيفرلاندىرۋ مەن اۆتوماتتاندىرۋ بويىنشا ءبىراز جۇمىس قولعا الىندى. ياعني، كىتاپحاناشىلار عانا ەمەس، وقىرمان، باسپالار جانە ءبىلىم باسقارماسى مەن مينيسترلىك وكىلدەرى دە جۇيەگە قوسىلا الادى. پلاتفورما كىتاپحانا اقپاراتىنا نەگىزدەلگەن قۇجات اينالىمى جۇمىسىن وڭتايلاندىرىپ، كىتاپحانا قورىن باسقارۋعا مۇمكىندىك بەرەدى»، - دەيدى مۇقاتاي مالىك.
جوبا اۆتورى جاڭا جۇيە كىتاپحاناشىلاردىڭ جۇمىسىن اۆتوماتتاندىرىپ قانا قويماي، «OQU» موبيلدى قوسىمشاسىن ۇسىناتىنىن جەتكىزدى.
«قازاقستاندىق وقۋشىلارعا الەمدىك كلاسسيكانى تەك ءتۇپنۇسقاسىندا عانا ەمەس، سونىمەن قاتار قازاق تىلىندە دە تەگىن وقۋعا مۇمكىندىك بەرەدى. اتالمىش قوسىمشادا ءار وقۋشى كەز كەلگەن كىتاپقا تاپسىرىس بەرىپ، ونىڭ قوردا بار-جوعىن تەكسەرە الادى. سيفرلىق كىتاپحانا - قالا مەن اۋىل كىتاپحاناسىن دامىتۋعا باعىتتالعان. بۇل وسكەلەڭ ۇرپاقتى كىتاپ وقۋعا ىنتالاندىرىپ، مادەني مۇرانىڭ ساقتالۋىنا دا زور سەپتىگىن تيگىزبەك»، - دەيدى ول.
بۇگىندە بۇل جۇيەگە الماتىنىڭ ءبىرقاتار مەكتەبى قوسىلدى.
«جاڭا جۇيەنىڭ كىتاپحاناعا تيگىزەر كومەگى زور. اتاپ ايتسام، قۇجاتتاردى پايدالانۋىمىزعا جانە كىتاپحانا قورىن باسقارۋعا مۇمكىندىك بەرەدى. كىتاپتاردىڭ ەلەكتروندى نۇسقاسى بار جانە وقۋ اعارتۋ مينيسترلىگى ۇسىنعان كىتاپ ءتىزىمىن قاراپ، ەركىن قول جەتكىزۋگە بولادى»، - دەيدى №19-مەكتەپتىڭ كىتاپحانا مەڭگەرۋشىسى ايناگۇل امانجولوۆا.
كىتاپحانانى سيفرلاندىرۋ جوباسى جاڭا وقۋ جىلىندا قازاقستاندىق مەكتەپتەردى تولىق قامتىماق.
