مۇسىلماندارعا جاڭا جىل تويلاۋعا بولا ما؟ ق م د ب جاۋابى

ساناۋلى كۇندەردەن كەيىن جاڭا جىل مەرەكەسى كەلەدى. وسىعان بايلانىستى الەۋمەتتىك جەلىلەردە «مۇسىلماندارعا جاڭا جىل تويلاۋعا بولمايدى» دەگەن اقپارات تاراپ جاتىر. جەلى قولدانۋشىلارىنىڭ ءبىر بولىگى مۇنى قاتە تۇسىنىك دەسە، ەكىنشى بولىگى جاڭا جىل تويلاۋعا ءۇزىلدى-كەسىلدى قارسى. شىنىمەن دە مۇسىلمان حالقىنا جاڭا جىل مەرەكەسىنە وراي داستارحان جايىپ، وتشاشۋ اتىپ، تويلاۋىنا بولا ما؟

ءاربىر حالىقتىڭ ءدىني مەرەكەلەرىنەن بولەك وزىندىك ۇلتتىق، وتاندىق مەرەكەسى، ءاربىر تۇلعانىڭ ومىرىندە ورىن الاتىن قۋانىشتى جايتتارىنا ارنالعان كۇندەرى بولادى. كوپشىلىك اسىعا كۇتەتىن جاڭا جىل مەيرامى دا سول كۇندەردىڭ ءبىرى. ول ءار ەلدە ءوزىنىڭ ۇلتتىق سالت-داستۇرىنە ساي تويلانادى. دەگەنمەن، مەرەكەنىڭ باستى بەلگىلەرى سانالاتىن بەزەندىرىلگەن جاڭا جىل شىرشاسى، جاڭاجىلدىق داستارحان، سىيلىقتار - بارىنە ورتاق.

ال يسلام ءدىنى بويىنشا نەگىزىنەن ەكى مەرەكە بار، ولار ورازا جانە قۇربان ايتتارى. ق م د ب شاريعات جانە ءپاتۋا ءبولىمىنىڭ مامانى ەلبەك تاسبولات ۇلىنىڭ ايتۋىنشا، قۇران كىتاپتىڭ «ءمايدا» سۇرەسى 48-اياتىندا «سەندەردەن ءاربىر (ۇممەت) ءۇشىن شاريعات جانە جول بەلگىلەدىك» دەپ جازىلعان.

ءدىن وكىلى ەڭ الدىمەن ۇيگە شىرشا قويىپ، ونى بەزەندىرۋ قايدان شىققانىن ءتۇسىندىردى.

«ۇيدە شىرشا قۇرۋ ءداستۇرى XVII عاسىردىڭ باسىندا ەۋروپادا پايدا بولعان دەسەدى. ال قازاق جەرىندە بۇل ءداستۇر كەڭەس ۇكىمەتى كەزىندە ورنىعا باستادى. وتكەن عاسىردىڭ 20-جىلدارىندا بولشەۆيكتەر «ەسكى رەجىمنىڭ ءداستۇرى» رەتىندە شىرشا قويۋعا جانە جاڭا جىلدى تويلاۋعا تىيىم سالعان بولاتىن، ءبىراق كەيىن وعان قايتا رۇقسات بەرىلدى. العاش رەت كرەمل شىرشاسى 1954 -جىلى ورناتىلىپتى، كۇنى بۇگىنگە دەيىن سول ءداستۇر جالعاسىپ كەلەدى. شىرشانى قاسيەتتەۋ، ۇلىقتاۋ ادامنىڭ ءدىني سەنىمىن بۇزۋى مۇمكىن»، - دەيدى مامان.

ەلبەك تاسبولات ۇلى سوزىنشە، شىرشا قۇرىپ، ونى بەزەندىرۋ مۇسىلمان حالقىنا جات.

«ەرتەدە ادامدار اعاشقا تاماق ءىلىپ قويسا، اڭشىلاردىڭ قانجىعاسى مايلانادى دەپ ساناعان. جاڭا جىل كۇنى ادامنىڭ كەلەر جىلعى تاعدىرى شەشىلەدى جانە شىرشانىڭ الدىندا قانداي تىلەك تىلەسەڭ، سول ورىندالادى دەپ سەنگەن. دەگەنمەن، جاڭا جىلدىڭ بەلگىسى رەتىندە ۇيگە شىرشا قۇرۋ، ونى بەزەندىرۋ بۇرىن ءبىزدىڭ داستۇردە بولماعان. ۇيىنە شىرشا تىگىپ، «اياز اتا كەلىپ، سىيلىق بەرەدى» دەپ اتا-انالار بالالارىن الداماعان»، - دەدى ءدىن وكىلى.

سوندىقتان مامان ادەپ-عۇرپىمىزدا بولماعان، شاريعاتىمىزدا بۇيىرىلماعان جاڭا جىل قارساڭىندا ۇيدە شىرشا قۇرۋ ادەتىنەن بارىنشا ارىلعان ءجون ەكەنىن ەسكەرتتى.

 

اقپارات دەرەككوزى: massaget.kz