«مۇسىلمان باۋىرلار» ۇيىمى فرانسيادا قاۋىپتى دەپ تانىلدى

استانا. KAZINFORM - سارسەنبى كۇنى ەليسەي سارايىندا قاۋىپسىزدىك كەڭەسىنىڭ كەزەكتەن تىس وتىرىسى ءوتىپ، وندا فرانسيا پرەزيدەنتى ە. ماكرونعا «مۇسىلمان باۋىرلار» قوزعالىسىنىڭ (قازاقستاندا تىيىم سالىنعان ۇيىم) قىزمەتى تۋرالى ەسەپ ۇسىنىلدى، دەپ حابارلايدى Kazinform ءتىلشىسى.

فرانسيا پرەزيدەنتى ەممانۋەل ماكرون قورعانىس جانە ۇلتتىق قاۋىپسىزدىك كەڭەسىنىڭ وتىرىسىن «رەسپۋبليكالىق ينستيتۋتتارعا يسلامشىل ۇيىمداردىڭ «اسەرىنە» قارسى تۇرۋعا» شاقىردى. بۇل تۋرالى فرانسيانىڭ حالىقارالىق راديوسى حابارلادى.

فرانسۋز شەنەۋنىكتەرى ۇلتتىق بىرلىككە قاۋىپ توندىرەتىن «مۇسىلمان باۋىرلار» قوزعالىسىنىڭ (قازاقستاندا تىيىم سالىنعان ۇيىم) قىزمەتىنە نازار اۋداردى. ءوز كەزەگىندە تىركەلگەن ۇيىم تاعىلعان ايىپتاردى جوققا شىعارىپ، ۇكىمەت ارەكەتىن «يسلاموفوبيا» دەپ ايىپتادى.

فرانسۋز قاۋىپسىزدىك كەڭەسىنىڭ وتىرىسى ە. ماكروننىڭ 2017-جىلى تەرروريزممەن جانە راديكالدى يسلاممەن كۇرەسۋ ونىڭ پرەزيدەنتتىگىنىڭ باسىم باعىتتارىنىڭ ءبىرى بولىپ جاريالانعان كەزدە باستالعان ساياساتىنىڭ جالعاسى بولدى، دەپ باسا ايتتى ەليسەي سارايى.

- پرەزيدەنت ماكرون 2017-جىلى قىزمەتىنە كىرىسكەن كەزدە قوعامدىق پىكىردە ەكى تاقىرىپ باسىم بولدى: جۇمىسسىزدىق جانە تەرروريزم، - دەپ ەسكە الدى ەليسەي سارايىنداعى RFI دەرەككوزى.

ە. ماكروننىڭ پرەزيدەنت رەتىندەگى العاشقى قادامدارىنىڭ ءبىرى توتەنشە جاعداي رەجيمىن ۇزارتۋ، سودان كەيىن ىشكى قاۋىپسىزدىك جانە تەرروريزمگە قارسى زاڭ (SILT) قابىلداۋ بولدى. بۇل شارالار بيۋجەتتى كوبەيتۋمەن جانە بارلاۋ قىزمەتتەرىن كۇشەيتۋمەن قاتار ءجۇردى.

قاۋىپسىزدىك كەڭەسىنە دايىندىق بارىسىندا «مۇسىلمان باۋىرلار» ۇيىمىنا قاتىستى زەرتتەۋلەرگە جاۋاپتىلار 200 دەن استام سۇحبات جۇرگىزىپ، فرانتسيانىڭ 10 دەپارتامەنتى مەن 4 ەلدىڭ بولىمدەرىندە بولدى»، - دەپ اتاپ ءوتتى دەرەككوز.

«مۇسىلمان باۋىرلار» قوزعالىسى فرانتسيا اۋماعىنا ەنۋدە بەلسەندى قارقىن كورسەتىپ وتىر، دەپ حابارلادى پرەزيدەنت اكىمشىلىگىنىڭ وكىلى. ونىڭ ايتۋىنشا، وقشاۋلانۋ مەن انكلاۆتار قۇرۋدى كوزدەيتىن سەپاراتيزمنەن ايىرماشىلىعى، «مۇسىلمان باۋىرلار» قوزعالىسىنىڭ ستراتەگياسى مەملەكەتتىك قۇرىلىمدارعا ەنۋگە باعىتتالعان: «كەرىسىنشە، بۇل وزدەرىن وقشاۋلاندىرماي، بيلىكتى، اتاپ ايتقاندا، مۋنيتسيپاليتەتتەردى جاۋلاپ الۋ ءۇشىن جاسىرىنۋ قيسىنىنىڭ كورىنىسى.

- ولارلىڭ تۇپكىلىكتى ماقساتى - بۇكىل فرانسۋز قوعامىن شاريعاتقا كوشىرۋ، - دەدى فرانسيانىڭ ىشكى ىستەر ءمينيسترى برۋنو رەتايلو، - بۇل قابىلدانبايدى، ويتكەنى بۇل فرانسيا رەسپۋبليكاسىنىڭ قاعيداتتارى مەن ۇلتتىق بىرلىك ماقساتتارىمەن مۇلدەم سايكەس كەلمەيدى.

ەسكە سالا كەتەيىك، بۇعان دەيىن قازاقستان مەن فرانسيا اراسىنداعى ادامداردى رەادميسسيالاۋ تۋرالى قۇجات قارالعانىن جازعان ەدىك.