مۇستافا وزتۇرىك مەنى قازاقستاندا كاراتە مەكتەبىن اشۋعا شاقىرعان ەدى - سپورتشىنىڭ گەرمانياداعى دوسى

استانا. KAZINFORM - قازاق تاەكۆوندوسىنىڭ نەگىزىن قالاۋشى، تاەكۆوندودان قارا بەلبەۋ 6 دان يەگەرى، حالىقارالىق دارەجەدەگى جاتتىقتىرۋشى مۇستافا وزتۇرىك ءتىرى بولعاندا بيل 70 جاسقا تولار ەدى.

گەرمانيانىڭ كەلن قالاسىندا تۇراتىن مۇستافا وزتۇرىكتىڭ سىرلاس دوسى عاني ماكين سپورتشىنى ساعىنىشپەن ەسكە الىپ، Kazinform تىلشىسىنە ءوز ەستەلىكتەرىمەن ءبولىستى.

«مۇستافا شەتەلدەگى قازاقتاردىڭ جارىق جۇلدىزى ەدى. مەن مۇستافا مەن بىرگە ءوستىم. ول تاەكۆوندو مەن كاراتە ونەرى بويىنشا جاتتىقتىم. ەكەمىز جاقىن دوس بولدىق. مۇستافا سىرتتا ءجۇرىپ، اكەسىنىڭ قايتىس بولعانىن كورە الماي قالعان ەدى. ءالى ەسىمدە ءبىر كۇنى كەشتە ەكەمىز اڭگىمەلەسىپ وتىردىق. ول ماعان اكەسىن ايتىپ، كوزىنە جاس الىپ ءوزىنىڭ جازعان ولەڭىن كورسەتتى. مەن ونىڭ جۇرەگىن جارىپ شىققان سوزدەرىن دومبىراعا سالىپ، اۋەن جازدىم. بۇل ءان كەيىن «جۇلدىزداردى تىلەيسىڭ بە» دەگەن اتپەن ەل اراسىنا تارادى. اكەگە دەگەن ۇلكەن تەبىرەنىستەن تۋعان ءان بۇل كۇندە ەل جۇرەگىندە»، - دەيدى ول.

سونىمەن بىرگە سپورتشىنىڭ دوسى ءوزىن قازاق ەلىنە شاقىرىپ، «بىرگە جۇمىس جاسايىق»، دەگەن مۇستافانىڭ ۇسىنىسىن ۋاقىتىندا قابىلداپ كەلە الماعانىنا وكىنەتىندىگىن جەتكىزدى.

«ول قازاقستاندا تاەكۆوندو مەكتەبىن اشتى. سول كەزدە ماعان حابارلاسىپ، قازاق ەلىنە كەلىپ كاراتە مەكتەبىن اشساڭ دەپ ءوتىنىش ايتتى. مەن وتباسىلىق جاعدايىممەن بارا المايتىنىمدى ايتقان ەدىم، ماعان وكپەلەدى. 6 اي بويى سويلەسپەي قويعان ەدى. كەيىن قۇربان ايت كەزىندە تۇركياعا كەلىپ، وسىندا جولىقتىق داستارحان باسىندا اڭگىمەلەستىك. مەن قازاقستانعا بارىپ، كارەتە مەكتەبىن قۇراتىن بولدىم. ول كىسى قازاقستانعا ۇشىپ كەتتى. مەندە قۇجاتتارىمدى جيناپ كوشۋگە رەتتەلىپ جاتقانمىن. ءبىر اپتادان كەيىن مۇستافانىڭ الماتىدا قازا تاپقانى تۋرالى قارالى حابار الدىق. جۇرەگىم قان جىلادى، مەنىڭ قازاقستانعا كەلۋ جوسپارىمدا سول كۇنى توقتادى»، - دەيدى عاني ماكين.

اۆتور

ريزابەك نۇسىپبەك ۇلى