اقتوبەدە كىرپىنى دوپ قىلىپ ويناعان جىگىتتەر قىلمىستىق جاۋاپقا تارتىلادى

اقتوبە. KAZINFORM - اقتوبە قالاسىنىڭ ترياتلون پاركىندە كىرپىنى دوپ قىلىپ تەۋىپ ويناعان جىگىتتەر جازالانادى. قازىر قىلمىستىق ءىس قوزعالدى.

الەۋمەتتىك جەلىگە جاريالانعان ۆيدەودان ءۇش جىگىتتىڭ كىرپىنى ءبىر بىرىنە تەۋىپ، دوپ قىلىپ ويناعانىن كورۋگە بولادى. بۇل ترياتلون پاركىندە تۇسىرىلگەن ۆيدەو. ءبىرى اياق كيىمىنە جابىسقان تىكەندەردى كورىپ تاڭقالىپ، تازارتۋعا كوشتى. پوليتسيا وسى ۆيدەونى تۇسىرگەن ادام پەن كىرپىنى تەپكىلەگەن جاستاردى تاپتى.

- الەۋمەتتىك جەلىلەرگە مونيتورينگ جۇرگىزۋ بارىسىندا ءبىر توپ جاستىڭ ءتىرى كىرپىنى تەپكىلەپ، فۋتبول ويناعانى انىقتالدى. تەكسەرۋ بارىسىندا بۇل ۆيدەونىڭ اقتوبە قالاسىندا تۇسىرىلگەنى بەلگىلى بولدى. كۇدىكتىلەر انىقتالىپ، پوليتسيا بولىمىنە جەتكىزىلدى. قىلمىستىق كودەكستىڭ «جانۋارلارعا قاتىگەزدىك جاساۋ» فاكتىسى بويىنشا ءىس قوزعالدى، - دەپ حابارلادى اقتوبە وبلىستىق پوليتسيا دەپارتامەنتى باسپا ءسوز قىزمەتىنىڭ جەتەكشىسى ەربولات سارقۇلوۆ.

ايتا كەتەيىك، ق ر قىلمىستىق كودەكسىنە سايكەس جانۋارلارعا قاتىگەزدىكپەن قاراپ، ونىڭ مەرتىگۋىنە اكەلىپ سوققان جاعدايدا 120 ا ە ك مولشەرىندە ايىپپۇل سالىنادى نەمەسە 30 تاۋلىككە دەيىن قاماۋعا الىنادى.

اۆتور
التىناي ساعىندىقوۆا