«ۇمراعا اپارامىن»: شىمكەنتتە 245 ادامدى الداعان تۋريستىك فيرما باسشىسى سوتتالدى

 شىمكەنتتە حالىقتى قاجىلىق ساپارعا الىپ بارامىن دەپ الداعان تۋريستىك فيرما ديرەكتورى 6 جىلعا سوتتالدى، دەپ حابارلايدى قازاقپارات ءتىلشىسى.

қажылық
Фото: "ҚазАқпарат" ХАА

شىمكەنت قالاسىنىڭ قىلمىستىق ىستەر جونىندەگى اۋدانارالىق سوتىندا قازاقستاننان قاجىلىق ساپارعا بارماق بولعانداردى الداعان «Kausar Travel» تۋريستىك فيرماسىنىڭ ديرەكتورىنا قاتىستى ۇكىم شىقتى.

سوتتالۋشى 245 ادامدى ۇمرا قاجىلىعىنا الىپ بارۋ ءۇشىن جولدامالاردى راسىمدەپ بەرمەك بولىپ، ولاردان جالپى كولەمى 255 ميلليون تەڭگەدەن استام اقشا العان. ونىڭ كىناسى جابىرلەنۋشىلەردىڭ، كۋاگەرلەردىڭ جاۋاپتارىمەن، زاتتاي ايعاقتارمەن جانە ىستەگى باسقا دا ماتەريالدارمەن تولىق دالەلدەندى.

سوت ۇكىمىمەن كومپانيا ديرەكتورى الاياقتىق جاسادى دەپ تانىلىپ، وعان 6 جىل مەرزىمگە باس بوستاندىعىنان ايىرۋ جازاسى تاعايىندالدى. سونداي- اق ول تۋريزم سالاسىنداعى قىزمەتپەن اينالىسۋ قۇقىعىنان 5 جىل مەرزىمگە ايىرىلدى. جابىرلەنۋشىلەردىڭ 225 ميلليون تەڭگەدەن استام سومانى ءوندىرىپ الۋ تۋرالى تالاپ- ارىزى دا قاناعاتتاندىرىلدى.

«قىلمىستىق كودەكستىڭ 190-بابى 3-بولىگىنىڭ سانكتسياسىندا 3 جىلدان 7 جىلعا دەيىن باس بوستاندىعىنان ايىرۋ تۇرىندەگى جازا كوزدەلگەن. سوت قىلمىستىق جاۋاپكەرشىلىكتى جەڭىلدەتەتىن جانە اۋىرلاتاتىن ءمان- جايلاردىڭ انىقتالماعانىن، ايىپتالۋشى ىستەگەن ءىس- ارەكەتىنىڭ اۋىرلىعىن سەزىنبەگەنىن، وكىنىش بىلدىرمەگەنىن، قىلمىسپەن كەلتىرىلگەن ماتەريالدىق زالالدىڭ ورنى تولماعانىن جانە جابىرلەنۋشىلەردىڭ قاتاڭ جازا تاعايىنداۋ تۋرالى پىكىرلەرىن ەسكەردى. سوت ۇكىمى زاڭدى كۇشىنە ەنگەن جوق»، - دەلىنگەن شىمكەنت قالالىق سوتىنىڭ باسپا ءسوز قىزمەتى تاراتقان اقپاراتتا.

سوڭعى جاڭالىقتار