كولىك پروكۋراتۋراسى: Mobius جۇيەسى زاڭسىز بيلەت ساۋداسىن جويعان جوق
جاسۇلان ەلامانوۆ اۋەلى «نۇرلى جول» باعدارلاماسىنىڭ قارجىسىن يگەرۋ بويىنشا كەشەندى تەكسەرۋ باستالعانىن ءمالىم ەتتى.
«تەكسەرۋلەر كولىكتىك باقىلاۋ ورگاندارىنىڭ جۇمىسىندا ەلەۋلى كەمشىلىكتەر بار ەكەنىن انىقتادى. وتكەن جىلى اكىمشىلىك جاۋاپكەرشىلىكتەن جالتارۋ، ارنايى رۇقساتتاردى زاڭسىز جولمەن بەرۋ، ءماجبۇرلى تىيىم شارالارىن قولدانباۋ سياقتى كەمشىلىكتەر انىقتالعان بولاتىن. ق ر يندۋستريا جانە ينفراقۇرىلىمدىق دامۋ مينيسترلىگىنە ءتيىستى ۇسىنىمدار بەرگەنبىز. سول ۇسىنىمدار بويىنشا كولىك كوميتەتىنە قاراستى اۋماقتىق بولىمشەلەردىڭ 14 قىزمەتكەرى اكىمشىلىك جاۋاپقا تارتىلدى. ال سىبايلاس جەمقورلىققا قارسى ءىس- قيمىل قىزمەتىنىڭ وكىلدەرى بىرنەشە لاۋازىمدى تۇلعانى پارا العانى ءۇشىن ۇستادى»، - دەگەن كولىك پروكۋراتۋراسىنىڭ وكىلى «قازاۆتوجول» ۇلتتىق كومپانياسىنىڭ جۇمىسىندا زاڭبۇزۋشىلىقتار انىقتالعانىن اتادى.
«كولىكتىك باقىلاۋ قىزمەتىنە ساۋال كوپ. 2015 -جىلدان بەرى «نۇرلى جول» باعدارلاماسى بويىنشا 51 جوبا جۇزەگە اسىرىلعان. ولار 1700 شاقىرىم اۆتوموبيل جولىن سالىپ جوندەۋگە باعىتتالعان جوبالار بولاتىن. جالپى سوماسى 700 ميلليارد تەڭگەگە تاياۋ. قازىر ۋاكىلەتتى ورگاندارمەن بىرگە سول قارجىنىڭ قانشالىقتى زاڭدى يگەرىلگەنىن تەكسەرىپ جاتىرمىز. ءازىردىڭ وزىندە «قازاۆتوجول» ۇلتتىق كومپانياسى مەن ونىڭ اۋماقتىق بولىمشەلەرىنىڭ قىزمەتىندە وتە كۇردەلى زاڭبۇزۋشىلىقتار انىقتالىپ جاتىر»، - دەدى ول.
جاسۇلان ەلامانوۆ تەمىرجول بيلەتىنىڭ ساۋداسىن رەتتەۋ ءۇشىن ىسكە قوسىلعان Mobius جۇيەسىنىڭ جۇمىسىن سىنعا الدى.
«بۇل جۇيە بيلەت الىپ ساتقىشتاردىڭ جولىن كەسۋى ءتيىس بولعان. قازىر ولاي بولماعانىن كورىپ وتىرمىز. بيلەتتى الىپ- ساتۋ ءالى جالعاسۋدا. وعان ب ا ق- تاعى ماتەريالدار دالەل. سونىڭ ءبىرى بويىنشا تەكسەرۋ جۇرگىزىپ، شىمكەنت قالاسىنداعى ۆوكزالداردان ءبىر كۇننىڭ ىشىندە بيلەتتى زاڭسىز ساتىپ جۇرگەن 6 ادامدى ۇستادىق. ولاردىڭ ءبارى اكىمشىلىك قۇقىق بۇزۋ كودەكسىنىڭ 449-بابى بويىنشا جاۋاپقا تارتىلدى. ءدال وسىنداي جاعداي الماتى قالاسىنىڭ ۆوكزالدارىندا دا ورىن الىپ وتىر. بۇل مىسالدار Mobius جۇيەسىن اينالىپ وتۋگە بولاتىنىن كورسەتەدى. بۇل ماسەلە ءالى جويىلماعاندىقتان، وزگە دە جاۋاپتى ورگاندارمەن بىرگە شارا قولدانامىز»، - دەدى ق ر باس كولىك پروكۋرورىنىڭ مىندەتىن اتقارۋشى.
اۆتور: ەسىمجان ناقتىباي