مەنىڭ ۇيىمدە دە ىستىق سۋ جوق - پاۆلودار قالاسىنىڭ اكىمى

استانا. KAZINFORM - جاز باستالسا، پاۆلودار قالاسىنىڭ كوپقاباتتى تۇرعىن ۇيلەرى ىستىق سۋدان اجىراتىلاتىنى داستۇرگە اينالعانى قاشان. ونىڭ سەبەبى دە جوق ەمەس. قۇبىرلار گيدراۆليكالىق سىناقتان وتكىزىلىپ، جەرگىلىكتى اكىمدىك اپاتتىڭ الدىن الۋعا كۇش سالىپ جاتىر.

دەسە دە، مۇنى تۇسىنبەيتىن پاۆلودارلىقتار ازايماي تۇر. شاھار باسشىسى حاسار حابىلبەكوۆ تۇرعىنداردى سابىرعا شاقىرىپ، ءوزى دە ىستىق سۋسىز وتىرعانىن العا تارتتى.

«مەن ىستىق سۋسىز قالعان قالا تۇرعىندارىنىڭ نارازىلىعىن جاقسى تۇسىنەمىن. قازىر مەن تۇراتىن ۇيدە دە ىستىق سۋ جوق. بۇل - الداعى جىلىتۋ ماۋسىمىندا توتەنشە جاعدايلاردى ازايتۋ ماقساتىندا جاسالعان قادام»، - دەدى قالا اكىمى.

بەلگىلى بولعانداي، 29-شىلدەدە پاۆلودار قالاسىنىڭ وڭتۇستىك بولىگىندە جىلۋ جەلىلەرىنىڭ گيدراۆليكالىق سىناقتارى باستالعان. 5-تامىزدا سولتۇستىك جەلى ايماعىندا دا وسىنداي سىناقتار باستالادى دەپ جوسپارلانىپ وتىر. ءتيىستى جۇمىستار 10-تامىزدا اياقتالۋى ءتيىس. سايكەسىنشە، پاۆلودارلىقتار سول ۋاقىتقا دەيىن تەفالمەن سۋ قايناتۋعا ءماجبۇر.

اۆتور
ورالحان قوجانوۆ