«مەنىڭ اتىم - قوجا» كىتابى فرانسۋز تىلىنە اۋدارىلىپ، پاريجدە تانىستىرىلدى - سۇلتانعازيەۆ

استانا. KAZINFORM - قازاق ادەبيەتىنىڭ كلاسسيگى بەردىبەك سوقپاقبايەۆتىڭ 100 جىلدىق مەرەيتويىنا وراي «مەنىڭ اتىم قوجا» كىتابى فرانسۋز تىلىنە اۋدارىلدى.

- قازاق ادەبيەتىنىڭ كلاسسيگى بەردىبەك سوقپاقبايەۆتىڭ 100 جىلدىعىن يۋنەسكو دەڭگەيىندە اتاپ ءوتۋ اياسىندا ءبىرقاتار ءىس-شارا ۇيىمداستىرىلدى. تۋعان جەرى نارىنقولدا جازۋشىعا ەسكەرتكىش ورناتىلىپ، ورتالىق ساياباققا ەسىمى بەرىلدى. سونداي-اق شىعارمالارى شەت تىلدەرىنە اۋدارىلدى. «مەنىڭ اتىم قوجا» كىتابى فرانسۋز تىلىنە اۋدارىلىپ، پاريجدە تۇساۋكەسەرى ءوتتى، - دەدى ءوڭىردىڭ الەۋمەتتىك-ەكونوميكالىق دامۋى تۋرالى ەسەپ بەرگەن مارات سۇلتانعازيەۆ.

ودان بولەك، وبلىس اكىمى كورۋ قابىلەتى بۇزىلعان بالالارعا ارنالعان برايل شريفتىمەن باسىلعان ەلىمىزدەگى العاشقى قازاق تىلىندەگى «اينالايىن» كىتابى جارىق كورگەنىن ايتتى.

- كىتاپ شىعارۋعا اقىن ماقپال مىسا باستاماشى بولدى. بۇل جيناق بالالاردىڭ دامۋىنا تەڭ مۇمكىندىكتەر بەرىپ، تولىققاندى ءومىر سۇرۋلەرىنە ىقپال ەتەدى. سونىمەن قاتار مادەنيەت سالاسى بويىنشا رايىمبەك جانە كەگەن اۋداندارىندا مادەنيەت ۇيلەرى سالىندى جانە 6 مادەنيەت ءۇيى كۇردەلى جوندەۋدەن ءوتىپ جاتىر. كەگەن اۋدانىنداعى ەكى مادەنيەت ءۇيدى جوندەۋ جۇمىسى بيىل اياقتالادى، - دەيدى م. سۇلتانعازيەۆ.

ايتا كەتەيىك، بيىل الماتى وبلىسى 63 ەلگە جەرگىلىكتى ءونىمدى ەكسپورتتادى.