مۇناي باعاسى كۇرت قۇلدىراپ كەتتى

استانا. KAZINFORM - مۇنايدىڭ الەمدىك باعاسى كۇرت قۇلدىراپ جاتىر. Brent ماركاسىنىڭ قۇنى 2021-جىلعى جەلتوقساننىڭ باسىنان بەرى العاش رەت باررەلىنە 68 دوللاردان تومەندەپ كەتتى.

ICE لوندون بيرجاسىندا Brent ماركالى مۇنايدىڭ ماۋسىم فيۋچەرستەرىنىڭ باعاسى استانا ۋاقىتى بويىنشا 13:54 تەگى جاعداي بويىنشا باررەلىنە 3,46 پايىزعا تومەندەپ، 67,71 دوللارعا جەتتى.

WTI ماركاسىنىڭ ماي فيۋچەرستەرىنىڭ قۇنى 3,68 پايىزعا تومەندەدى، باررەلىنە 64,48 دوللارعا دەيىن جەتتى.

ايتا كەتەيىك، قارا التىن قۇنى ا ق ش پرەزيدەنتى دونالد ترامپ 185 ەلدەن يمپورتتالاتىن تاۋارلارعا جوعارى تاريف ەنگىزگەننەن كەيىن تومەندەي باستادى.

ەسكە سالايىق، بۇعان دەيىن اقش پرەزيدەنتى دونالد ترامپ شەتەلدەن اكەلىنەتىن بارلىق تاۋارعا باج سالىعى ەنگىزىلەتىنىن جاريالادى.

بازالىق تاريف 10 پايىز دەڭگەيىندە، الايدا ول كوپتەگەن مەملەكەت ءۇشىن جوعارى بولماق. ماسەلەن، قىتايدان كەلەتىن تاۋارلارعا باج سالىعى 34 پايىز، ەو ەلدەرىنەن كەلەتىن تاۋارعا 20 پايىز، شۆەيتساريا ءۇشىن 31 پايىز، ۇلىبريتانيا ءۇشىن 10 پايىز، يزرايل ءۇشىن 17 پايىز، قازاقستان ءۇشىن 27 پايىز بولادى.

ەڭ جوعارى تولەم ۆەتنامعا (46 پايىز)، كامبودجاعا (49 پايىز)، لاوسقا (48 پايىز) جۇكتەلگەن.

كەيىنىرەك قازاقستاننىڭ ساۋدا مينيسترلىگى وسى جاعدايعا پىكىر ءبىلدىردى.