مەن «جالعان ديماشقا» قالاي الداندىم

جالعان ديماش
«ايقىن» اقپارات

استانا. KAZINFORM - «- گۇلزينا اپاي، ديماشتان سۇحبات الدىم! - وندا جۇمىسقا كەل دە، ماقالانى دايىنداپ بەر. ەرتەڭگى نومىرگە بەرىپ ۇلگەرەمىز».

ءبارى ءبولىم باسشىسى گۇلزينا بەكتاسوۆامەن بولعان وسى ديالوگتان باستالدى. 2017 -جىلدىڭ ءساۋىرى. ديماش قۇدايبەرگەننىڭ I am a singer جوباسىندا ءبىر جارىم ميلليارد قىتاي اۋديتورياسىن تاڭعالدىرىپ، تامساندىرىپ، جەڭىسكە جەتكەن كەزى.

«ايقىن» گازەتىنىڭ ءبىر بەتىنە «دۇنيە ديدارىنداعى ديماش» دەپ كولەمدى ماقالا بەردىك. ەسىمدە، سول كەزدەگى باس رەداكتورىمىز نۇرتورە ءجۇسىپ قويىپ بەرگەن سول تاقىرىپ وقىرمانعا ۇناپ، «قالاي ءساتتى قويىلعان، ءا؟» دەسكەن. ارتىنشا وسى جەڭىسىنەن كەيىن ديماشتان سۇحبات العىم كەلدى. ءتىپتى، تاپسىرما قىلىپ تا موينىما الدىم. دەرەۋ بايلانىس ءنومىرىن ىزدەدىم. جۋرناليستەر وتىراتىن چاتتان سۇراپ، سول جەردەن قانات ايتبايەۆتىڭ ءنومىرىن العام. قوڭىراۋ بارىپ تۇردى. تۇتقانى ءبىر ەر ادام الىپ، تىلدەستىك.

ديماشتىڭ اكەسىمەن سويلەسىپ تۇرمىن دەپ ويلاعان مەن بۇيىمتايىمدى ايتتىم. الگى ەر ادام «ونىڭ قازىر ۋاقىتى وتە تىعىز. سۇحبات بەرۋى قيىن» دەدى. «ءبىر امالىن تاۋىپ كورەيىكشى. 5 مينۋت بولسا دا سويلەسىپ، سۇراقتارىمدى قويسام دەپ ەدىم. مۇمكىندىك شىعا قالسا، ماعان ايتىڭىزشى. ءنومىرىم وسى، ەسىمىم - جادىرا» دەدىم.

جۇمىستان قايتىپ كەتكەم. ول كەزدە ستۋدەنتپىن، جاتاقحانادا تۇرامىن. ساعات كەشكى سەگىزدىڭ كەزىندە «قانات ايتبايەۆ» دەپ ساقتالعان نومىردەن قوڭىراۋ كەلىپ ءتۇستى. سويلەستىم. «جادىرا، قازىر ديماش اۋەجايدا. باسقا ەلگە ساپارعا شىققالى جاتىرمىز. ءارى كەتسە 5-10 مينۋت ۋاقىتى بار. سۇراقتارىڭ دايىن بولسا، قازىر كەرى قوڭىراۋ شالعاندا قويىپ الساڭ بولادى» دەدى. سول كەزدەگى قۋانىشىمدى سوزبەن جەتكىزە المايمىن.

«البەتتە، دايىنمىن» دەپ تۇتقانى قويىپ، قويىن داپتەردە ءتىزىلىپ تۇرعان سۇراقتاردى پىسىقتاپ الدىم دا، «ديماشقا» قويدىم. ول دا ەش ساسپاستان ساۋالدارىما جاۋاپ بەردى. قۇددى سول سۇحباتقا دايىندالعانداي زۋىلداپ تۇر. ءبىر-ەكى جەردە قاتەلەسكەنى بولماسا، ديماشتىڭ فاناتى ما دەرسىڭ. ءبارىن بىلەدى ەكەن.

قوش، قىسقا سۇحباتتى العان بەتتە گۇلزينا اپايعا حابارلاستىم. جۇمىس ۋاقىتى مەندە بىتكەنىمەن، رەداكسيادا ول كەزدە قىزۋ گازەت شىعارۋ پروتسەسى بولىپ جاتادى. جاتاقحانادان الىپ- ۇشىپ شىقتىم دا، تاكسيمەن جەتتىم. ماقالانى دايىنداپ، ونى گازەتتىڭ سوڭعى بەتىنە ادەمىلەپ بەردىك. ۇيگە تۇنگى ەكىدەن وتە قايتتىم. كەلدىم دە، توسەگىمە قۇلاي ءتۇستىم. بۇل كۇن مەن ءۇشىن ماقتانىشقا تولى كۇن بولعان ەدى…

كەشە جۇمىستان كەش قايتقاندىقتان، ءسال كەشىرەك بارامىن دەپ ۇيقىمدى قاندىرماق بولعام. تەلەفونىمنىڭ دىبىسىن ءوشىرىپ تاستاپپىن. تاڭەرتەڭ وننىڭ كەزىندە ويانىپ كەتتىم دە، ءوزىمدى «جۇلدىز» سەزىندىم. وكىنىشتىسى، ونشا جاقسى ماعىنادا ەمەس ەدى.

«Facebook-تا پالەنباي تۇگەنباي ۇلى ءسىزدى تەگتەدى، پىكىر قالدىردى، بەلگىلەدى» دەگەن حابارلاندىرۋدىڭ جەتى اتاسى تۇر. WhatsApp-تا دا حات تولىپ قالعان. الىنباعان قوڭىراۋ قانشا؟! نە بولىپ جاتقانىن ءتۇسىنىپ ۇلگەرمەدىم. تاعى ءبىر قوڭىراۋ كەلىپ جاتىر. بەلگىسىز ءنومىر. الدىم. «سەن، وڭباعان، حايپ ىزدەگەن بىلىكسىز جۋرناليست ەكەنسىڭ» دەپ القىمنان الدى. سويتسەم، ديماشتىڭ مەنەدجەرى ەكەن. ماسەلەنى ءالى دە تۇسىنە الماي ءبىراز تۇردىم.

«نەگە وتىرىك سۇحبات الاسىڭ؟ ديماش ساعان سۇحبات بەرگەن جوق. دەرەۋ ايىبىڭدى جۋ. ماقالانى ءوشىر دە، كەشىرىم سۇرا» دەدى دە قويىپ تاستادى. كەلەسى قوڭىراۋ رەداكسيادان ءتۇستى. «جۇمىسقا كەل»…

بارار جولدا حابارلامالاردى كەزەك-كەزەك اشتىم. الەۋمەتتىك جەلىدە جۇرت ەكىگە بولىنگەن. باستى كەيىپكەر، ياعني مەن ءالى ۇندەمەگەن سوڭ ءوزارا «سوعىسىپ» جاتىر ەكەن. ءبىرى قانشالىقتى دارىنسىز، ۇياتسىز ەكەنىمدى ايتىپ جاتسا، كەلەسى تاراپ ءالى جاس ەكەنىمدى، جاقسى جۋرناليست ەكەنىمدى جازىپ جاتىر. سول كۇنى ادام بويىندا بولاتىن ەموتسيانىڭ بارلىق سپەكترىن سەزىنىپ شىقتىم دەسەم، ارتىق ەمەس. قورىقتىم، ۇيالدىم، ءتۇڭىلدىم، قۋاندىم، قاناتتاندىم، وي ءتۇيدىم. جۇمىسقا جەتكەنشە ەلەڭ-الاڭ حالدە بولدىم. ۇرىس ەستىپ، سوگىس الامىن دەپ ويلادىم. «ارىپتەستەردىڭ كوزىنە قالاي قارايمىن؟» دەگەن وي دا مازالادى.

قوش، سونىمەن جۇمىسقا جەتتىم. قولىم دىرىلدەپ، كابينەتكە كىردىم. وعان دەيىن جىلاپ العام. جاعداي مەن ويلاعاننان باسقاشا ءوربىدى. ءبىر ارىپتەسىم بەتىمنەن المادى. كەرىسىنشە، «ونداي- ونداي بولىپ تۇرادى» دەپ جۇباتتى.

ەندى ماسەلەنى قالاي شەشەمىز؟ وسى تۋرالى ويلاندىق. الدىمەن ديماشتىڭ اناسىنا حابارلاستىق. بۇل جولى چاتتان ەمەس، سەنىمدى ادامنان الدىق. ەڭكىلدەپ جىلاپ تۇرىپ سويلەستىم. ونىڭ ءبارى ءوزىڭدى اقتاۋ ءۇشىن، بولماسا اياۋشىلىق تانىتسىن دەپ ەمەس، شىنايى، ەرىكسىز بولىپ جاتتى. تەلەفون ارقىلى بولعان سول اڭگىمەدەن سوڭ ادام كوڭىلىنىڭ دارقاندىعىن، انا مەيىرىمىنىڭ قۋاتىن شىن سەزدىم. «جادىرا، اينالايىن، الاڭداما. ءبارى دۇرىس. ءبارىمىز قاتەلەسەمىز» دەدى سۆەتا اپا. الدىڭعى سۇحباتتى تەرىستەپ، اناسىنىڭ پىكىرىمەن سايتقا بەردىك.

بالا كوڭىلىم قۇلازىپ قالماسىن دەپ قانشا جۋرناليست اعا-اپكە حابارلاسىپ، قولداپ جاتتى. ارتىنشا جىبەرگەن قاتەلىگىمدى مويىنداپ، پاراقشاما پوست جازدىم. سول جازبام جىلى ءسوز بەن جىگەرلەندىرەتىن تىلەككە تولدى. ءوز قاتەمدى تولىق ءتۇسىندىم.

فاكتچەكيڭ جاساۋدىڭ دەرەكتەرگە عانا ەمەس، بارلىق جەرگە كەرەك ەكەنىن ۇقتىم. سودان بەرى سپيكەردىڭ ءنومىرىن السام، GetContact-قا سالىپ، باسقالاردىڭ ونى قالاي دەپ ساقتاعانىن تەكسەرىپ الاتىن ادەت پايدا بولدى. «فەيك ديماشتى» وسى «وتىرىگى» ءۇشىن سوتقا بەرۋدى دە ويلادىق. زاڭدى جاقسى بىلەتىن ارىپتەستەر سونداي ۇسىنىس تا ايتقان. ءبىراق ءنومىرىمدى ءبىلىپ العان فەيك مازا بەرمەي، قورقىتىپ-ۇركىتتى. جۇمىستان كوبىنە كەش قايتامىن. ءبىرازعا دەيىن ارتىمنان بىرەۋ كەلە جاتقان جوق پا دەپ تەكسەرىپ ءجۇردىم. ءساۋىر سولاي سەرگەلدەڭگە تولى بولدى. سودان كەيىن ءبىراز ۋاقىت بويى وزىمە سەنىڭكىرەمەي، قورقاقتاپ قالدىم.

2017 -جىل، جەلتوقساننىڭ سوڭى. گازەتكە جىلجابار ءنومىر دايىنداپ جاتىرمىز. باسشىلىق «وسى جولى تاعى ءبىر حابارلاسىپ، سۇحباتقا كەلىسىپ كورسەڭشى» دەدى. قانات اعا مەن سۆەتا اپانىڭ شىن ءنومىرى بار.

«جىعىلعان كۇرەسكە تويماستىڭ» كۇنىن كەشتىم بە، قايدام، تاعى قوڭىراۋ شالدىم. ونىڭ الدىندا باۋىرجان باباجان ۇلىنا ءوتىنىش ايتىپ، سۇحباتقا كوندىرۋىن سۇراعام. ءوتىنىشىمدى جەردە قالدىرمادى. ءسويتىپ، «جىل ءانشىسى» دەگەن ايدار قويىپ، «ونەر الەمىندە شەكارا جوق» دەگەن ءبىر بەتتىك ماتەريالدى باسپاعا جىبەردىك. بۇل جولى فەيكتەن ەمەس، ديماشتان الىنعان سۇحبات بولدى. كوڭىلىم كوتەرىلىپ، اۋىلعا قۋانىپ قايتتىم.

مەن - ديماشتىڭ جەرلەسىمىن. اقتوبەگە جەتكەن سوڭ سۆەتا اپاعا حابارلاستىم. كوزىن كورىپ، تانىسقىم كەلەتىنىن ايتتىم. ءبىراۋىز سوزگە كەلمەستەن «ءۇيدىڭ ادرەسى مىناداي. كەلە عوي» دەدى. قولىما ازىن- اۋلاق سىيلىعىمدى الىپ، باردىم. سويلەستىم. پاتشا كوڭىل، كورەگەندىلىكتىڭ ۇلگىسىن تاعى ءبىر كوردىم. ديماشتىڭ بەكزات بولمىسىنىڭ ءتۇبى قايدان شىققانىن ءتۇسىندىم. ءبىر وزىمە كەڭ داستارقانىن دا جايىپ قويىپتى. اسىقپاي وتىرىپ، سىرلاستىق. كىنا ارتپادى، كاسىپقويلىعىما ءشۇبا كەلتىرمەدى. كەرىسىنشە، قولدادى، دەم بەردى.

وسىلايشا، «جۋرناليستيكا جولىنداعى كەيسىم» دەپ اڭگىمەلەپ بەرەتىن ءبىر وقيعا قورجىنعا قوسىلدى. وسى ماقالانى جازاردا كونتاكتىمدى ءبىر شولىپ شىقتىم. باسقالار الگى كىسىگە الدانباسىن دەگەن ويمەن جازسام كەرەك، «فەيك» دەپ ساقتاپ قويىپپىن. ودان كەيىن باسقا بىرەۋدى الدادى ما، بىلمەيمىن. مەن ساباق العانداي، ونىڭ دا باسىنا ءتيدى دەپ ۇمىتتەنەمىن.

 

جادىرا اققايىر

«ايقىن» اقپارات

سوڭعى جاڭالىقتار