مەن جابىرلەنۋشىمىن - قايرات نۇرتاس مالىمدەمە جاسادى

استانا. KAZINFORM - استانا قالاسىنىڭ اكىمشىلىك ىستەر بويىنشا مامانداندىرىلعان سوتىندا تانىمال ءانشى قايرات نۇرتاستىڭ ءىسى ونلاين قارالۋدا.

سوت مالىمەتىنشە، ەكى حاتتاما تولتىرىلعان. ءبىرىنشىسى - اكىمشىلىك قۇقىقبۇزۋشىلىقتار تۋرالى كودەكستىڭ 73-بابى 1-تارماعى - «دەنساۋلىققا قاساقانا جەڭىل زيان كەلتىرۋ»، ەكىنشىسى - قىلمىستىق كودەكستىڭ 293-بابىنىڭ 2-بولىگى - «اۋە كەمەسى بورتىندا جاسالعان بۇزاقىلىق».

ق. نۇرتاستىڭ زاڭدى وكىلى ءارى اناسى گۇلزيرا ايداربەكوۆانىڭ ايتۋىنشا، جابىرلەنۋشى اسىلبەك بەكقايىروۆ جانە ايىپتالۋشى قايرات نۇرتاس - بۇرىننان دوس. جانجالدىڭ باستى سەبەبى -ءانشىنىڭ شاقىرعان تويعا بارماۋى.

«مەنى دوسىم تويعا شاقىردى، وعان بارا المايمىن دەدىم. بارماساڭ تىزەرلەپ كەلەسىڭ دەدى، مەن دە كەلمەيمىن دەپ بالاعاتپەن جاۋاپ بەردىم. سودان كەيىن ول مەنى ۇشاقتىڭ ىشىندە ۇستاپ الىپ، سەن مەنى بالاعاتتادىڭ دەپ، باسىمنان ەكى رەت ۇردى. مەنىڭ دە نامىسىم بار، مەن دە ونى ۇردىم. ودان كەيىن تىنىش وتىرسام، ارتىمنان كەپ تاعى ۇردى. ودان باسقا ەشتەڭە بىلمەيمىن. مەن قوعامدىق ءتارتىپتى بۇزبادىم. مەن جابىرلەنۋشىمىن»، - دەدى قايرات نۇرتاس.

بورت ۇشاعىندا قوعامدىق ءتارتىپ بۇزىلعانىن، جابىرلەنۋشى دەنساۋلىعىنا جەڭىل زالال كەلتىرگەنىن راستادى.

ءوز كەزەگىندە اسىلبەك بەكقايىروۆ ءبىرىنشى سوققىنى قايرات نۇرتاستىڭ ءوزى جاساعانىن ايتۋدا.

«24-ساۋىردە قايراتتى ورال قالاسىنا دوسىمنىڭ تويىنا شاقىردىم. ول كىسى جاۋاپ بەرمەدى، 7-8 رەت قوڭىراۋ شالدىم. تاعى ءبىر حابارلاما جىبەردىم، وعان جاۋاپ رەتىندە بالاعات سوزدەرى بار حابارلاما كەلدى. نە سەبەپتى مەنى بالاعاتتادى، ءانشىنىڭ كومەكشىلەرىن سۇراپ بىلە المادىم، قايراتتىڭ وزىمەن كەزدەسە المادىم. ۇشاقتا كەزدەسىپ قالعاندا قاسىنا بارىپ ءمان- جايدى سۇرادىم، ول تاعى بالاعاتپەن جاۋاپ قايتاردى. بورتسەرىك مەنى الىپ كەتىپ جاتقاندا قايرات مەنى ۇرىپ ۇلگەردى. ەكەۋمىز جانجالداستىق، سوسىن ۇشاقتىڭ ەكى جاعىنا وتىرعىزىپ قويدى. تۇسكەندە بىردەن قولىمىزعا كىسەن سالدى، ءبىزدى پوليتسيا بولىمىنە جەتكىزدى»، - دەيدى جابىرلەنۋشى.

جابىرلەنۋشى ا. بەكقايىروۆ بىتىمگەرلىك بويىنشا ءوتىنىم بەردى جانە انشىگە قارسى تالاپ- ارىزى جوق ەكەنىن ايتتى. وسىعان وراي، ق. نۇرتاس قورعاۋشىسى اكىمشىلىك ىستەگى ءبىرىنشى باپتى قىسقارتۋدى سۇرادى.

ال ايىپتاۋشى پروكۋرور ءانشىنى 15-تاۋلىككە قاماۋعا الۋ جازاسىن سۇرادى. ال ءانشى الدا بىرنەشە كونسەرت پەن توي جوسپارلانعانىن ايتىپ، ايىپپۇل سالۋدى سۇراپ وتىر.

سوت شەشىم شىعارۋ ءۇشىن باسقا بولمەگە كەتتى.

ەسكە سالا كەتسەك، «الماتى- استانا» باعىتىنداعى اۋە رەيسىندە ۇساق بۇزاقىلىق جانە دەنساۋلىققا قاساقانا جەڭىل زيان كەلتىرۋ فاكتىسى بويىنشا اكىمشىلىك ءىس قوزعالعان ەدى.