مەن دە قىزىمنان ايىرىلعان اداممىن - بيشىمبايەۆتىڭ سوتتا سويلەگەن ءسوزى

استانا. KAZINFORM - ەلوردا سوتىندا ايەلىن ءولتىردى دەپ ايىپ تاعىلعان بۇرىنعى مينيستر قۋاندىق بيشىمبايەۆ ءسوز سويلەپ، سالتاناتتىڭ تۋىستارىنان كەشىرىم سۇرادى جانە ءوزى دە ءبىر كەزدەرى قىزىنان ايىرىلعانىن ايتتى.

«مەن تەرگەۋ مەن العاشقى سوت وتىرىسىنان بەرى بولعان وقيعاعا، سالتاناتتىڭ ولىمىنە كىنالى ەكەنىمدى ايتىپ كەلەمىن. كەشە مەنى جۇرەكسىز، ىستەگەن ىسىنە وكىنبەيتىن، ازابىن سەزىنبەيتىن ادام دەپ كىنالاپ جاتتى. نەمەسە سالتاناتتى ۇنەمى قارالادى دەپ ايىپتاۋدا. شىنىندا دا، بولعان وقيعاعا مەن كىنالىمىن. ۆيدەودان كورگەندەرىڭىزدەي، ۇستالعان ساتتە-اق ءبارىن موينىداعانمىن. الايدا ەكى كۇننەن كەيىن ەش تۇسىندىرمەسىز، ەش نەگىزدەمەسىز ماعان ەڭ قاتال ايىپ تاعىلاتىنىن كۇتپەدىم. سۇيگەن ادامىم، جۇبايىم سالتاناتتى قاسقانا ويلاستىرىپ، جوسپارلاپ، اسقان قاتىگەزدىكپەن ءولتىردى دەپ ايىپتاعىسى كەلەدى»، - دەدى ق. بيشىمبايەۆ.

ايىپتالۋشى سول ساتتە قالاي ارەكەت ەتۋ كەرەگىن بىلمەگەنىن ايتۋدا.

«مەن جاي عانا ەموتسيونالدى كۇيزەلىسكە ۇشىرادىم، نە بولعانىن تۇسىنە المادىم، قابىلداي المادىم. مەن قاتتى وكىنەمىن. كۇن سايىن قۇدايدان مەنى كەشىرۋىن سۇرايمىن. سانالى نەمەسە بەيسانالى تۇردە بولعان ءىس بولدى. قازىر وسىندا بولۋىم كەرەك جانە ءوزىمدى ۇستاۋىم كەرەك، مۇمكىندىگىنشە ءوزىمدى قورعاۋىم كەرەك. ءبىراق بۇل ءوزىمدى كىناسىز دەپ سانايتىن جۇرەكسىز ادام ەكەنىمدى بىلدىرمەيدى. مۇنىڭ ءبارىن باستان وتكەرۋىم كەرەگىن تۇسىنەمىن. قانداي جازا بەرىلسە دە، ونى كۇنانىڭ وتەۋى رەتىندە قابىلدايمىن، الەۋمەتتىك جەلىلەردە ءورشىپ تۇرعان بارلىق جەككورۋشىلىكتەرمەن قوسا كوتەرۋىم كەرەك. مەن ءوزىمدى استە ماقتان تۇتپايمىن. ءوزىمدى اقتاۋعا تىرىسىپ جاتقانداي ويلاماڭىزدار. كەز كەلگەن ادام سەكىلدى مەن دە ىستەگەن ءىسىم ءۇشىن كەز كەلگەن جازانى كوتەرۋگە دايىنمىن. ءبىراق سالتاناتتى قاساقانا ءولتىرۋ ويىم بولعان جوق، مۇنىمەن ەش كەلىسە المايمىن جانە ول ءۇشىن جاۋاپكەرشىلىك الا المايمىن»، - دەدى ق. بيشىمبايەۆ.

ول جابىرلەنۋشى تاراپتان - ونىڭ اعاسىنان، سالتاناتتىڭ اتا-اناسىنان كەشىرىم سۇرادى.

«شىنىندا دا، مەنىڭ ءومىرىم وسىنداي. مەن دە ءبىر كەزدەرى قىزىمنان ايىرىلدىم. 23 جاسىمدا مەنىڭ دە قىزىم بولدى. ەكى جاسىندا اۋرۋدان شەتىنەپ كەتتى. مۇنى سالىستىرۋ مۇمكىن ەمەس ەكەنى تۇسىنىكتى. مەن ومىرىمدە ەشكىمدى قاساقانا ولتىرگىم كەلگەن جوق. ءبىراق ومىرىمىزدە وسىنداي جاعداي بولدى»، - دەدى ق. بيشىمبايەۆ.