مەمقىزمەتشىلەرگە سىياقى بەرۋگە تىيىم سالاتىنداي نەگىز جوق - قارجى مينيسترلىگى

استانا. KAZINFORM - ق ر قارجى مينيسترلىگى مەملەكەتتىك قىزمەتشىلەرگە سىياقى بەرۋگە بايلانىستى وتىنىشتەردىڭ كوپتەپ تۇسۋىنە بايلانىستى جاعدايدى ءتۇسىندىردى.

«قازاقستان رەسپۋبليكاسى ۇكىمەتىنىڭ 2001 -جىلدىڭ 29-تامىزىنداعى №1127-قاۋلىسىنا سايكەس مەملەكەتتىك قىزمەتشىلەرگە سىياقى تولەۋ، ماتەريالدىق كومەك كورسەتۋ، لاۋازىمدىق ايلىقاقىلارىنا ۇستەمەاقىلار بەلگىلەۋ بيۋدجەت قاراجاتىن ۇنەمدەۋ ەسەبىنەن عانا جۇزەگە اسىرىلادى. وسى قاۋلى ارقىلى شىعىس باپتارىنىڭ ناقتى تىزبەسى ايقىندالعان. ولاردىڭ ەسەبىنەن ۇنەمدەۋ قالىپتاسقان جاعدايدا عانا سىياقى تولەنۋى مۇمكىن (ءىسساپارلارعا، كوممۋنالدى جانە كولىك قىزمەتتەرىنە، بايلانىس قىزمەتتەرىنە، ءۇي-جايلاردى جالعا الۋعا جانە ت. ب. شىعىستار بويىنشا ۇنەمدەۋ). بۇگىندە اتالعان قاۋلىعا، سونداي-اق باسقا دا زاڭنامالىق اكتىلەرگە سىياقىلاردى شەكتەيتىن وزگەرىستەر ەنگىزىلمەگەندىكتەن مەملەكەتتىك قىزمەتشىلەرگە سىياقىلاردى بەرۋگە تىيىم سالاتىنداي نەگىز جوق»، - دەلىنگەن مينيسترلىكتىڭ حابارلاماسىندا.

قارجى مينيسترلىگىنىڭ وسىعان دەيىنگى حابارلاماسىندا ۇكىمەت قاۋلىسىنىڭ نورمالارىن بۇلجىتپاي ۇستانۋ قاجەتتىگى جانە باعدارلاما اكىمشىلەرىنىڭ قىزمەتكەرلەردى تىزبەدە كورسەتىلگەندەردەن بولەك بيۋدجەتتىك باپتاردان قاراجاتتى سىياقىعا پايدالانۋعا جول بەرمەۋ تۋرالى ايتىلعان بولاتىن. سەبەبى ينۆەستيتسيالىق جوبالاردى ىسكە اسىرۋدان جانە/نەمەسە مەملەكەتتىك اپپاراتتىڭ جۇمىسىنا اسەر ەتپەيتىن ماتەريالدىق اكتيۆتەردى ساتىپ الۋدان ۇنەمدەلگەن قاراجات بيۋدجەتكە قايتارىلۋعا ءتيىس.

ايتا كەتەيىك، وسىعان دەيىن قارجى ۆيتسە- ءمينيسترى ءمادي تاكيەۆ ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە تۇرىپ قازاقستاندا مەملەكەتتىك قىزمەتشىلەرگە ۇنەمدەلگەن بيۋدجەت قارجىسى سىياقى تۇرىندە بەرىلمەيتىنى تۋرالى ايتقان بولاتىن.

كەيىنىرەك پرەزيدەنت كەڭەسشىسى، بۇرىنعى قارجى ءمينيسترى ەرۇلان جاماۋبايەۆ وسى ماسەلەگە قاتىستى پىكىر ءبىلدىردى.

«قارجى مينيسترلىگىنىڭ جاۋاپتى حاتشىسى، قارجى ءمينيسترى بولىپ جۇمىس ىستەدىم. بۇل جەردە انىقتاپ كەتەتىن ماسەلە بار. ەگەر بيۋدجەتتە سىياقىعا قاراجات كوزدەلگەن بولسا، وندا ونى ەشكىم الىپ قويمايدى. سىياقى رەتىندە بەرىلەدى. دەگەنمەن، مەملەكەتتىك ورگاندار ساتىپ الۋ پروتسەسىن جۇرگىزگەندە ۇنەم بولادى. سول ۇنەمدى قارجى مينيسترلىگى سىياقى رەتىندە بەرمەۋ تۋرالى شەشىم قابىلداپ وتىر. ءبىراق ول ءالى زاڭداستىرىلماعان. قازىنالىق شوت بار. سودان ءبىر-بىرىنە اۋدارۋعا بوگەت قويماقشى. ارينە، وزىمدە بىلەمىن، قانشاما ادام مەملەكەتتىك قىزمەتتە. قاراپايىم قىزمەتكەرلەرگە اۋىر تيەدى. ودان ءوزىم دە وتكەنمىن. سوندىقتان دۇرىس شەشىم قابىلداۋ قاجەت»، - دەدى ەرۇلان جاماۋبايەۆ.