مەملەكەتتىگىمىزدى ساقتاۋ ءۇشىن اۋىزبىرشىلىگىمىزدى ساقتايىق - پرەزيدەنت
ەل پرەزيدەنتى قاسىم-جومارت توقايەۆ جاڭاجىلدىق بەينەقۇتتىقتاۋىندا ەلىمىزدەگى تاتۋلىقتى، تىنىشتىق پەن تۇراقتىلىقتى باعالاۋ جونىندە ايتتى، دەپ حابارلايدى Kazinform.
«ءبىز ءاربىر تاڭعا ءۇمىت ارتامىز، ءاربىر جىلدان جاقسىلىق كۇتەمىز. ال ءۇمىتتىڭ اقتالۋى، ارمان-ماقساتتىڭ ورىندالۋى وزىمىزگە بايلانىستى. ەڭ باستىسى، ەلىمىزدەگى تاتۋلىقتى، تىنىشتىق پەن تۇراقتىلىقتى باعالايىق. بىرلىگى مىقتى ەلدىڭ رۋحى بيىك بولادى. ۇلى اباي ايتقانداي، بىرلىك دەگەنىمىز - ەڭ الدىمەن، اقىلعا - بىرلىك. مەملەكەتتىگىمىزدى ساقتاۋ ءۇشىن اۋىزبىرشىلىگىمىزدى ساقتايىق. قاستەرلى وتانىمىزدى كوركەيتەمىز دەسەك، تاباندى ەڭبەك ەتەيىك»، - دەدى پرەزيدەنت.
ءوز قۇتتىقتاۋىندا مەملەكەت باسشىسى دامىعان مەملەكەت بولۋ ءۇشىن وزىق بىلىمگە ۇمتىلىپ، جاڭا تەحنولوگيانى، سونىڭ ىشىندە جاساندى ينتەللەكتىنى يگەرۋ قاجەتتىگىن باسا ايتتى.
«تاۋەلسىزدىك ۇرپاقتارى جاقسى قاسيەتتەردى بويىنا ءسىڭىرىپ ءوسىپ كەلەدى. ولار ونەردە، سپورتتا، عىلىمدا جانە بيزنەستە زور تابىسقا جەتۋدە. ءبىز جاستارىمىزدىڭ وسىنداي مىقتى، ادال ازامات بولعانىن ماقتان تۇتامىز. قازاقستاننىڭ بولاشاعى - وتانشىل، ءبىلىمدى، ەڭبەكقور ازاماتتاردىڭ، ياعني جاستاردىڭ قولىندا. مەن جاس ۇرپاقتىڭ جاسامپازدىق قۋاتىنا سەنەمىن!»، - دەدى قاسىم-جومارت توقايەۆ.
سونداي-اق، پرەزيدەنت تەك بولاشاققا، تەك العا ۇمتىلاتىن مەملەكەت بولۋ كەرەگىن، ءبىر ەل بولىپ بىرىكسەك، كەز كەلگەن بەلەستى باعىندىراتىنىمىزدى اتاپ ءوتتى.
«ەڭ باستىسى، ەلىمىز تىنىش، ىرگەمىز ءبۇتىن بولسىن! جاڭا جىلعا دەيىن ساناۋلى سەكۋندتار قالدى. تابالدىرىقتان اتتاعالى تۇرعان جىل ءبارىمىز ءۇشىن جەتىستىكتەرگە تولى بولسىن!»، - دەدى مەملەكەت باسشىسى.
