مەملەكەتتىك تۋدى پرەزيدەنتىمىز سەنىپ تاپسىردى، ەندى ءۇمىتتى اقتاۋ ءبىزدىڭ مىندەت - اسلانبەك شىمبەرگەنوۆ

استانا. KAZINFORM - وسىدان بىرەر كۇن بۇرىن پرەزيدەنت جازعى وليمپيادا ويىندارىنا قاتىساتىن قازاقستان قۇراما كومانداسىنىڭ مۇشەلەرىمەن كەزدەسىپ، پاريج وليمپياداسىنىڭ رەسمي اشىلۋ سالتاناتىندا كوك بايراعىمىزدى كوتەرىپ شىعاتىن بوكسشى اسلانبەك شىمبەرگەنوۆ پەن جەڭىل اتلەت ولگا سافرونوۆاعا كوك بايراعىمىزدى تابىستاعان ەدى.

بۇگىن بوكسشى اسلانبەك شىمبەرگەنوۆ kaz.inform.kz تىلشىسىنە ەكسكليۋزيۆ سۇحبات بەرىپ، مەملەكەت باسشىسىنان تۋدى قابىلداپ العان ساتىندەگى اسەرىمەن ءبولىستى.

«مەملەكەت باسشىسى قاسىم-جومارت توقايەۆ ءوز قولىمەن كوكبايراعىمىزدى تابىستاعاندا قاتتى تولقىپ تۇردىم. بۇل - مەن ءۇشىن تاريحي ءسات! مەملەكەت باسشىسى وسىلاي بىزگە سەنىم ارتتى. ەندى ول سەنىمدى اقتاۋ بىزگە ۇلكەن جاۋاپكەرشىلىك جۇكتەيدى. سول ءۇشىن ءبىز وليمپيادا ويىندارىندا بار كۇشىمىزدى سالۋىمىز كەرەك»، - دەپ باستادى اڭگىمەسىن بوكسشى اسلانبەك شىمبەرگەنوۆ.

سونىمەن قاتار بوكسشى ءوزىنىڭ وليمپيادا ويىندارىنىڭ سالتاناتتى اشىلۋ راسىمىندە مەملەكەتتىك تۋىمىزدى كوتەرىپ شىعاتىنىن كىمنەن، قالاي ەستىگەنىن ايتىپ بەردى.

«ماعان پاريج تورىندە ەلىمىزدىڭ كوكبايراعىن كوتەرىپ شىعاتىنىمدى ەڭ ءبىرىنشى بولىپ، بوكس فەدەراتسياسىنىڭ پرەزيدەنتى تەلەفون ارقىلى ايتتى. ەستىگەندە، ارينە قۋاندىم. بۇل ۇلكەن وبىرويلى مىندەت ەكەنىن ءتۇسىندىم. ەندى، باستى ماقسات - وليمپيادا ويىندارىندا جاقسى ونەر كورسەتىپ، جەڭىس تۇعىرىنان كورىنۋىمىز كەرەك. قازىر باپكەرلەرىمىزبەن بىرگە وليمپياداعا سوڭعى وقۋ-جاتتىعۋ جيىندارىندا ءجۇرمىز. دايىندىعىم وتە جاقسى»، - دەدى بوكسشى.

ايتا كەتەيىك، فرانتسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.