مەملەكەتتىك تاپسىرىسپەن باسىلاتىن كىتاپتار قالاي ىرىكتەلەدى

кітап
Фото: Pexels

  استانا. KAZINFORM - مادەنيەت جانە اقپارات مينيسترلىگى Kazinform ساۋالىنا جولداعان جاۋاپتا مەملەكەتتىك تاپسىرىسپەن باسىلىپ شىعاتىن ەڭبەكتەردىڭ قالاي ىرىكتەلەتىنىن ءتۇسىندىردى.

«ەڭبەكتەرىن مەملەكەتتىك تاپسىرىسپەن باسىپ شىعارۋ جانە تاراتۋ باعىتىندا كەلىپ تۇسكەن جەكە جانە زاڭدى تۇلعالاردىڭ ءوتىنىمى 2021 -جىلى دەپۋتاتتاردىڭ ۇسىنىسىمەن ەنگىزىلگەن ۇلتتىق مەملەكەتتىك كىتاپ پالاتاسىنىڭ ينتەرنەت- رەسۋرسىندا الدىن الا ىرىكتەۋ بويىنشا ونلاين- پلاتفورماعا وقىرماندار داۋىس بەرۋ ءۇشىن جۇكتەلەدى. بۇل جۇيەنىڭ تيىمدىلىگى - قازاقستاننىڭ ءاربىر ازاماتى مەملەكەتتىك تاپسىرىس بويىنشا باسىلىپ شىعاتىن شىعارمالاردى ىرىكتەۋگە قاتىسۋعا مۇمكىندىك الادى. بۇل ءوز كەزەگىندە قوعامنىڭ وتاندىق ادەبيەتكە دەگەن سۇرانىسىن، شىعارمالار جانرىن، وقىرمانداردىڭ جاس ساناتتارىن تالداۋعا، سونداي- اق شىعارما اۆتورلارىنىڭ تانىمال بولۋىنا مۇمكىندىك بەرەدى»، - دەپ جازىلعان ۆەدومستۆو مالىمەتىندە.

دەگەنمەن وقىرمان قاۋىمنىڭ بەرگەن داۋىسى ىرىكتەۋدە شەشۋشى رول اتقارمايدى.

مەملەكەتتىك تاپسىرىسپەن باسىلاتىن ەڭبەكتەردى ءۇش كەزەڭدە ءۇش ءتۇرلى كوميسسيا انىقتايدى.

«بۇدان كەيىن وقىرماندار داۋىسىن ەسكەرە وتىرىپ، كىتاپ پالاتاسى جانىنان قۇرىلعان تاۋەلسىز كوميسسيا (ىرىكتەۋدىڭ ءبىرىنشى كەزەڭى) قاراۋىنا ۇسىنىلادى. تاۋەلسىز كوميسسيا اۆتورلىق تۋىندىنى باسىپ شىعارۋعا وتىنىمدەردى الدىن الا ىرىكتەۋدى قورىتىندىلايدى. تاۋەلسىز كوميسسيانىڭ قاراۋىنان وتكەن ەڭبەكتەر شىعارمانىڭ كوركەمدىك قۇندىلىعىن، وزەكتىلىگىن، ورىندىلىعىن، سونداي- اق ولاردى زەرتتەپ قورىتىندى بەرۋ ءۇشىن ساراپتامالىق كوميسسياعا (ىرىكتەۋدىڭ ەكىنشى كەزەڭى) بەرىلەدى. ساراپتاما كوميسسياسىنىڭ وڭ قورىتىندىسىن العان شىعارمالار ۆەدومستۆوارالىق كوميسسيانىڭ (ىرىكتەۋدىڭ ءۇشىنشى كەزەڭى) قاراۋىنا ەنگىزىلەدى. ۆەدومستۆوارالىق كوميسسيانىڭ شەشىمى قوعامدىق ماڭىزى بار ادەبيەتتەردى باسىپ شىعارۋعا نەگىز بولىپ تابىلادى. وسى رەتتە ىرىكتەۋدىڭ ءۇش كەزەڭىنەن وڭ قورىتىندى العان وتىنىمدەر مەملەكەتتىك تاپسىرىسپەن باسىلىپ شىعاتىن ادەبيەتتەر تىزىمىنە ەنگىزىلىپ، جىل سوڭىنا دەيىن ءارقايسى 3 مىڭ دانا تارالىمدا باسىلىپ شىعىپ، كىتاپحانالارعا تاراتىلادى. كىتاپحانالار قورى نەگىزىنەن مەملەكەتتىك تاپسىرىسپەن جارىق كورگەن ادەبيەتتەرمەن تولىقتىرىلىپ وتىرادى»، — دەپ ءتۇسىندىردى مينيسترلىكتەگىلەر.

سوڭعى جاڭالىقتار