مەملەكەتتىك قىزمەتكە وزگە سالا وكىلدەرىن دە تارتۋ كەرەك - توقايەۆ

 استانا. KAZINFORM - مەملەكەت باسشىسى قاسىم- جومارت توقايەۆ پرەزيدەنتتىك جاستار كادر رەزەرۆىنىڭ فورۋمىندا بولاشاقتا مەملەكەتتىك قىزمەتكە بيزنەس، اۋىل شارۋاشىلىعى، قارجى، مەديتسينا، ءبىلىم جانە باسقا دا سەكتورلاردا تابىستى ەڭبەك ەتىپ جۇرگەن ادامداردى تارتۋ كەرەكتىگىن ايتتى.

جيىندا سويلەگەن سوزىندە پرەزيدەنت مەملەكەتتىك قىزمەتتە بىلىكتى سالالىق مامانداردىڭ تاپشىلىعى سەزىلەتىنىن ايتتى.

- بۇل رەتتە ەلىمىزدەگى بيزنەس، اۋىل شارۋاشىلىعى، قارجى، مەديتسينا، ءبىلىم جانە باسقا دا سەكتورلاردا تابىستى ەڭبەك ەتىپ جۇرگەن ادامدار جەتكىلىكتى. ناقتى ناتيجەگە ۇمتىلىپ، تۇتىنۋشىنىڭ قاجەتتىلىگىن وتەۋ ءۇشىن جۇمىس ىستەيتىن وسىنداي مامانداردىڭ الەۋەتىن جۇمىلدىرۋ كەرەك. مەملەكەتتىك قىزمەتتىڭ گيبريدتى مودەلىن ەنگىزۋدى جالعاستىرعان ءجون. ول ءۇشىن جەكە سەكتوردان بىلىكتى مامانداردى مەملەكەتتىك قىزمەتكە قابىلداۋ ەرەجەسىن اناعۇرلىم ەركىن، جەڭىل ەتىپ جاساۋ ماسەلەسىن مۇقيات پىسىقتاۋ قاجەت، - دەدى قاسىم-جومارت توقايەۆ.

پرەزيدەنت مەملەكەتتىك قىزمەتتىڭ تارتىمدىلىعىن ارتتىرۋ ءۇشىن جەكە سەكتورمەن باسەكەلەس ەڭبەكاقى بەلگىلەۋ قاجەت ەكەنىن اتاپ ءوتتى.

- ارينە جالاقى مەن سىياقىنى شەكتەن تىس كوپ بەرۋگە بولمايدى. ءبىراق تاڭەرتەڭنەن كەشكە دەيىن، ۋاقىتپەن ساناسپاي جۇمىس ىستەيتىن مەملەكەتتىك قىزمەتكەرلەرگە بەلگىلى ءبىر دەڭگەيدە ماتەريالدىق وتەماقى تولەنۋى كەرەك دەپ سانايمىن. ماسەلە - وتە وزەكتى. ءبىز مۇنى مەملەكەتتىك قىزمەتشىلەردىڭ پايداسىنا شەشەمىز. ولاردىڭ باسپانا ماسەلەسىن دە ءتيىستى دەڭگەيدە شەشۋ كەرەك. بۇل بويىنشا سينگاپۋر جانە باسقا دا ەلدەردىڭ تاجىريبەسىنە نازار اۋدارعان ءجون. ولاردىڭ مەملەكەتتىك باسقارۋ جۇيەسىندەگى ءتيىمدى ءادىس- تاسىلدەردى قاراستىرۋ قاجەت، - دەدى قاسىم-جومارت توقايەۆ.

سونداي- اق مەملەكەت باسشىسى عالىمداردى، ساراپشىلار مەن بەلسەندى ازاماتتاردى، اسىرەسە، ەرىكتىلەردى قىزمەتكە تارتۋدىڭ ءمانى زور دەپ سانايدى.

اۆتور

ايدار وسپاناليەۆ