مەملەكەتتىك مەنشىكتەگى مەكتەپتەردى جەكەگە بەرۋگە تىيىم سالىنادى - ءماجىلىس

وقۋشىلاردىڭ باعاسى مەن ءۇي تاپسىرماسى تۋرالى اقپاراتتى اتا-انالارعا تەگىن بەرۋ تۋرالى ناقتى مىندەتتەر بەلگىلەندى.

بۇل تۋرالى ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە دەپۋتات اسحات ايماعامبەتوۆ ءمالىم ەتتى، دەپ حابارلايدى Kazinform.

«بۇل قۇجاتتا مەملەكەتتىك مەنشىكتەگى مەكتەپ پەن كوللەدجدەردى جەكە مەنشىككە بەرۋگە تىيىم سالاتىن نورما بار. بۇل وتە ماڭىزدى نورما. سايكەسىنشە، ەندى بارلىق مەملەكەتتىك ءبىلىم بەرۋ مەكەمەلەرى جەكەشەلەندىرۋگە جاتپايتىن بولادى»، - دەدى ا. ايماعامبەتوۆ.

كەلەسى نورما جەمقورلىق تاۋەكەلدەرىن ازايتۋعا، اشىقتىق پەن بىرىزدىلىكتى قامتاماسىز ەتۋگە باعىتتالعان.

«زاڭدا بالاباقشاعا بالانى كەزەككە قويۋدى، ودان ورىن بەرۋدى جانە ءبىلىم بەرۋ قىزمەتكەرلەرىن جۇمىسقا الۋدى تەك ءبىرىڭعاي اقپاراتتىق باعدارلاما اياسىندا ۇيىمداستىرۋ بويىنشا نورما ەنگىزىلدى»، - دەدى دەپۋتات.

سونىمەن قاتار ول اتا-انالاردان كوپ تۇسەتىن شاعىمنىڭ ءبىرى - وقۋشىلاردىڭ باعاسى مەن ءۇي تاپسىرماسىنا تەگىن قول جەتكىزۋ ماسەلەسىنە قاتىستى.

«بۇل تاقىرىپتا بىرنەشە دەپۋتاتتىق ساۋالدار جاريالانعان. وسىعان وراي زاڭ جوباسىندا وقۋشىلاردىڭ باعاسى مەن ءۇي تاپسىرماسى تۋرالى اقپاراتتى اتا-انالارعا تەگىن بەرۋ تۋرالى ناقتى مىندەتتەر بەلگىلەندى»، - دەدى اسحات ايماعامبەتوۆ.

بۇدان بۇرىن حابارلانعانداي، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى.

قۇجات اياسىندا وقىشۋلاردىڭ ساباق كەزىندە ۇيالى تەلەفونداردى پايدالانۋىنا شەكتەۋ ەنگىزىلدى.