مەملەكەتتىك ماراپات جاۋاپكەرشىلىكتى ەسەلەي تۇسەدى - ۇلتتىق ۇلان جاۋىنگەرى
ورال. KAZINFORM - اقوردادا ەلىمىزدە بولعان سۋ تاسقىنى كەزىندە بەلسەنە اتسالىسقان ازاماتتاردى سالتاناتتى تۇردە ماراپاتتاۋ راسىمىنە قاتىسقانداردىڭ ءبىرى – ق ر ۇلتتىق ۇلانى «باتىس» وڭىرلىك قولباسشىلىعىنا قاراستى 5517-اسكەري ءبولىمىنىڭ اسكەري قىزمەتشىسى، ەفرەيتور نۇربول اسقاپ.

پرەزيدەنت قاسىم-جومارت توقايەۆ باتىس قازاقستاندىق اسكەري قىزمەتشىنى «جاۋىنگەرلىك ەڭبەگى ءۇشىن» مەدالىمەن ماراپاتتادى.
نۇربول اسقاپ مەملەكەت باسشىسىنىڭ قولىنان وسىنداي جوعارى ماراپات الۋ ۇلكەن مارتەبە ەكەندىگىن ايتتى.
«ەل پرەزيدەنتى كەۋدەمە وسى مەدالدى تاققان ساتتە تۇلا بويىمدى ماقتانىش پەن قۋانىش سەزىمى تەربەپ، وزىمە ءوزىم سەنە المادىم. ارينە، ول ساتتەگى تولعانىستى سوزبەن ايتىپ جەتكىزۋ مۇمكىن ەمەس. سول ساتتە مەنىڭ تۇسىنگەنىم، ماعان ارتىلعان جاۋاپكەرشىلىكتىڭ ەسەلەنە تۇسكەنىن سەزىندىم. بۇل مەدال مەن ءۇشىن وتە ىستىق. سەبەبى، قازاقستان رەسپۋبليكاسىنىڭ ۇلتتىق ۇلانى قاتارىنداعى قىزمەت بارىسىندا يە بولعان العاشقى مەدالىمنىڭ ورنى ەرەكشە»، دەدى نۇربول اسقاپ.
ۇلتتىق ۇلان جاۋىنگەرى بيىلعى 21-ساۋىردە ورالداعى ساياجاي اۋماعىندا تاسقىن سۋمەن اعىپ بارا جاتقان ەر ادامدى قۇتقارىپ قالۋعا قاتىسقان ەدى.
ەسكە سالا كەتەيىك، بۇدان بۇرىن ورال قالاسىندا ەر ادامنىڭ تاسقىن سۋمەن اعىپ كەتە جازداعانىن جازعان بولاتىنبىز.
سونداي-اق باتىس قازاقستاندىق قۇتقارۋشى پرەزيدەنتتىڭ قولىنان ماراپات الۋ ۇلكەن قۇرمەت ەكەندىگىن ايتتى.