مەملەكەتتىك ارحيۆ قۇجاتتارى سيفرلانىپ، قىزمەتكەرلەردىڭ جالاقىسى ءوستى
الماتى. KAZINFORM - الماتى قالاسىنىڭ مەملەكەتتىك ارحيۆىندەگى قۇجاتتاردىڭ 10 ميلليوننان استام پاراعى سيفرلاندىرىلدى. تەحنيكالىق تۇرعىدا كۇردەلى جۇمىستى تەز ءارى ساپالى ىسكە اسىرۋ ءۇشىن مەملەكەتتىك مۇراعات ماتەريالدىق-تەحنيكالىق بازانى جاڭارتىپ، قۇجاتتاردى قالپىنا كەلتىرۋ زەرتحاناسىن اشتى.
الماتى قالالىق مادەنيەت باسقارماسىنىڭ باسشىسى عاني مايلىبايەۆتىڭ ايتۋىنشا، وسى ماقساتتا جەرگىلىكتى بيۋجەتتەن سوڭعى 10 جىلدا ءبىرىنشى رەت قارجى بولىنگەن.
«وسىلايشا، الماتىنىڭ مەملەكەتتىك ارحيۆى پلانەتارلىق تيپتەگى كوپفورماتتى جەتى سكانەر، ا3 جانە ا2 فورماتىنداعى كوپ اعىندى جەتى سكانەر، وبەكتىلەردىڭ 3D ينتەراكتيۆتى كەسكىنىن جاساۋعا ارنالعان جۇيە، ميكروفيلمگە ارنالعان COM جۇيەسىن، ميكروفيلم وقۋعا ارنالعان جابدىقتى، كەڭ فورماتتى پلوتتەردى، ەلەكتر گيلوتينىن، قۇجاتتاردى قالپىنا كەلتىرۋگە ارنالعان پرەسس جابدىعىن، جارىق ۇستەلىن، قاعاز جانە پەرگامەنت بەتىندەگى قۇجاتتاردى قالپىنا كەلتىرۋگە ارنالعان مۋلتيفۋنكتسيونالدى جابدىقتى، سونداي-اق 110 مونوبلوك پەن 34 كومپيۋتەر ساتىپ الدى»، - دەيدى باسقارما باسشىسى.
سونىمەن قاتار ول ارحيۆتە قاعاز بەتىندەگى جانە اۋديوۆيزۋالدى قۇجاتتاردى سيفرلاندىرۋ جۇمىسى قارقىندى ءجۇرىپ جاتقانىن جەتكىزدى.
«قاعاز قۇجاتتاردى سيفرلىق فورماتقا كوشىرۋ - ۋاقىت تالابى. قالا اكىمى ەربولات دوسايەۆ سالا وكىلدەرىنە ۇلكەن قولداۋ كورسەتۋ ءۇشىن ءبىرقاتار شەشىم قابىلدادى. ماسەلەن، سوڭعى ەكى جىلدا ارحيۆتەگى ماتەريالدىق-تەحنيكالىق بازا جاڭارىپ، مامانداردىڭ جالاقىسى %30 عا ءوستى. سونداي-اق مەكەمەدەگى ستاتسيونارلىق سورەلەردىڭ ورنىنا موبيلدى سورەلەر الىندى. سول ارقىلى قۇجات قابىلداۋ جانە ساقتاۋ ورنى كەڭەيدى»، - دەدى عاني مايلىبايەۆ.
