مەملەكەتتىك اۋديت: «قازمۇنايگاز» اكتيۆتەرىنىڭ وتكىزىلۋىنە باقىلاۋ كۇشەيتىلدى
استانا. KAZINFORM - «قازمۇنايگاز» ۇلتتىق كومپانياسى ق ر جوعارى اۋديتورلىق پالاتاسىنىڭ نۇسقاماسى شەڭبەرىندە ءوز اكتيۆتەرىن وتكىزۋ شارتتارىنىڭ ورىندالۋىنا باقىلاۋدى كۇشەيتتى.
جەكەشەلەندىرۋ سالاسىنداعى مەملەكەت ساياساتىنىڭ تيىمدىلىگىنە جۇرگىزىلگەن اۋديت قورىتىندىسى بويىنشا (2023 -جىلعى جەلتوقسان) ق م گ اكتيۆتەرىن ساتىپ الۋ-ساتۋ شارتتارىنىڭ ورىندالۋىن باقىلاۋدىڭ قولدانىستاعى جۇيەسى ولاردىڭ ورىندالۋ تالاپتارىنىڭ انىقتىعىن قامتاماسىز ەتپەيتىنى انىقتالدى. وسىعان بايلانىستى ۇلتتىق كومپانياعا جۇمىس نورماتيۆتەرىنە قاجەتتى وزگەرىستەر ەنگىزۋ تاپسىرىلدى.
ناتيجەسىندە ق م گ ديرەكتورلار كەڭەسىنىڭ 2024 -جىلعى 17-قىركۇيەكتەگى شەشىمىمەن اكتيۆتەردى وتكىزۋ قاعيدالارى جاڭا رەداكسيادا بەكىتىلدى. مۇندا باسەكەلەس ورتاعا بەرىلەتىن زاڭدى تۇلعا قىزمەتىنىڭ بەيىنىن، جۇمىسشىلاردىڭ جالپى سانىن، ولاردىڭ جالاقى دەڭگەيىن ساقتاۋ سياقتى جانە باسقا دا تالاپتار كوزدەلگەن.
جاڭارتىلعان قاعيدالارعا سايكەس اكتيۆتى وتكىزۋدىڭ بارلىق تالاپتارى مىندەتتى تۇردە ساتىپ الۋ-ساتۋ شارتىنا ەنگىزىلىپ، ودان ءارى ولاردىڭ ورىندالۋىن راستايتىن توقسان سايىنعى، جارتى جىلدىق نەمەسە جىلدىق ەسەپتەر ۇسىنىلىپ وتىرۋعا ءتيىس.
مەملەكەتتىك اۋديت قورىتىندىلارى بويىنشا باسقا دا تاپسىرمالاردىڭ ورىندالۋى جوعارى اۋديتورلىق پالاتانىڭ باقىلاۋىندا.
ايتا كەتەيىك، بۇعان دەيىن جوعارى اۋديتورلىق پالاتا قازمۇنايگاز بەن بايتەرەككە اۋديت جۇرگىزە باستاعانىن حابارلاعان بولاتىنبىز.
