مەملەكەتتەن 500 مىڭ وقۋشىعا 22,2 ميلليارد تەڭگەنىڭ قولداۋى كورسەتىلدى
استانا. KAZINFORM - مەملەكەت الەۋمەتتىك جاعىنان وسال وتباسىلارداعى 500 مىڭنان استام بالاعا قولداۋ كورسەتتى. بيىلعى جىلى جالپىعا بىردەي ءبىلىم بەرۋ قورىنان اتا- انالاردىڭ ەسەپشوتتارىنا 22,2 ميلليارد تەڭگەدەن استام قاراجات اۋدارىلدى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى وبلىستىق ءبىلىم باسقارمالارىنا سىلتەمە جاساپ.
قولداۋ اتاۋلى الەۋمەتتىك كومەك (ا ا ك) الاتىن، تابىسى ەڭ تومەنگى كۇنكورىس دەڭگەيىنەن تومەن وتباسىلارداعى وقۋشىلارعا، جەتىم جانە اتا-اناسىنىڭ قامقورلىعىنسىز قالعان بالالارعا، سونداي-اق توتەنشە جاعدايلار سالدارىنان شۇعىل كومەككە مۇقتاج وتباسىلارداعى مەكتەپ وقۋشىلارىنا كورسەتىلدى. جەرگىلىكتى اتقارۋشى ورگانداردىڭ مالىمەتى بويىنشا، ءوتىنىش بەرگەندەردىڭ 100 پايىزى مەملەكەتتەن قارجىلاي كومەك العان.
«بۇعان دەيىن وقۋ-اعارتۋ مينيسترلىگى كومەك كورسەتۋ مەحانيزمىن، ونىڭ ىشىندە اتا-انالاردىڭ ەسەپشوتتارىنا اقشا اۋدارۋدى جەتىلدىرۋ بويىنشا شارالار قابىلداعان بولاتىن. بۇل شارا اتا- انالار مەن بالالارعا كيىم- كەشەك پەن وقۋ قۇرالدارىن جەتكىزۋشىلەردى ءوز بەتىنشە تاڭداۋعا مۇمكىندىك بەردى، وسىلايشا ساپاسىز تاۋارلاردى الۋدى بولدىرمايدى. بيىلعى جىلى ءاربىر وقۋشىعا ورتاشا ەسەپپەن 45 مىڭ تەڭگە شاماسىندا قاراجات ءبولىندى»، - دەپ اتاپ ءوتتى بالالاردىڭ قۇقىعىن قورعاۋ كوميتەتى ءتوراعاسىنىڭ ورىنباسارى يۋليا وۆەچكينا.
سونداي-اق وقۋ-اعارتۋ مينيسترلىگىنىڭ باستاماسىمەن جىل سايىن 30-قىركۇيەككە دەيىن جالعاساتىن «مەكتەپكە جول» رەسپۋبليكالىق قايىرىمدىلىق اكتسياسى وتكىزىلەدى. بۇگىنگى كۇنى اكتسيا اياسىندا ونداعان مىڭ وتباسى دەمەۋشىلەردىڭ كومەگىنە يە بولدى.
