مەملەكەتكە قۇنى 1 ميلليارد تەڭگەدەن اساتىن مۇلىك قايتارىلدى
استانا. KAZINFORM - الماتى وبلىسى قاراساي اۋدانىنىڭ پروكۋراتۋراسى مەملەكەتتىك مۇلىكتى قورعاۋ سالاسىندا زاڭ تالاپتارىنىڭ ساقتالۋىن قامتاماسىز ەتتى.
جۇرگىزىلگەن تالداۋ ناتيجەسىندە 2017-جىلى حالىقتى اۋىزسۋمەن قامتاماسىز ەتەتىن «تاۋسامالى» كوممۋنالدىق مەملەكەتتىك كاسىپورنىن جەكەشەلەندىرۋ كەزىندە ساۋدا-ساتتىق وتكىزۋ ءتارتىبىنىڭ بۇزىلعانى انىقتالدى.
كاسىپورىننىڭ قۇنى 1,1 ميلليارد تەڭگەگە باعالانادى.
زاڭدىلىقتى قالپىنا كەلتىرۋ ماقساتىندا پروكۋراتۋرا زاڭسىز جەكەشەلەندىرىلگەن مۇلىكتى مەملەكەتتىك مەنشىككە قايتارۋ جانە ساتىپ الۋ-ساتۋ شارتىن جارامسىز دەپ تانۋ تۋرالى تالاپ ارىزبەن سوتقا جۇگىندى.
2024-جىلعى 21-قازاندا الماتى وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن پروكۋراتۋرانىڭ تالاپتارى تولىق قاناعاتتاندىرىلدى. ساتىپ الۋ-ساتۋ شارتى زاڭسىز دەپ تانىلىپ، كاسىپورىن مەملەكەتتىك مەنشىككە قايتارىلدى. سوت شەشىمى زاڭدى كۇشىنە ەندى.
«تاۋسامالى» كاسىپورىنىنىڭ مەملەكەتتىك مەنشىككە قايتارىلۋى اۋدان تۇرعىندارىن ساپالى اۋىزسۋمەن تۇراقتى قامتاماسىز ەتۋگە جانە حالىق مۇددەسىنە ساي كاسىپورىن قىزمەتىن باقىلاۋدى قالپىنا كەلتىرۋگە مۇمكىندىك بەرەدى.
