مەملەكەت سۋ تاسقىنى كەزىندە جاپا شەككەن تۇرعىندارعا قانداي كومەك كورسەتتى

استانا. KAZINFORM - ەلىمىزدە كوكتەمگى سۋ تاسقىنى كەزىندە مال-مۇلكىنەن، ۇيىنەن ايىرىلىپ، كاسىبىنە شىعىن كەلگەن جاندارعا مەملەكەت تاراپىنان تولىققاندى كومەك كورسەتىلدى. بۇل تۋرالى ق ر پرەزيدەنتىنىڭ كەڭەسشىسى - باسپا ءسوز حاتشىسى بەرىك ءۋالي Egemen Qazaqstan گازەتىندە جازدى.

- كوكتەمگى سۋ تاسقىنى ەلدى ابىگەرگە سالىپ، 10 وڭىردە جەرگىلىكتى دەڭگەيدەگى توتەنشە جاعداي جاريالاندى.

مەملەكەت باسشىسى ادامداردى دەرەۋ قاۋىپسىز جەرگە كوشىرۋ جانە قارعىن سۋدان زارداپ شەككەن ازاماتتارعا قاجەتتى كومەك كورسەتۋ جونىندە تاپسىرما بەردى. ەڭ كوپ زارداپ شەككەن ءۇش وبلىس - باتىس قازاقستان، سولتۇستىك قازاقستان جانە قوستاناي وبلىستارىنا بارىپ، حالىقتىڭ مۇڭ- مۇقتاجىن تىڭدادى.

تاسقىن سۋدىڭ سالدارىنان مال-مۇلكىنەن ايىرىلعان جانداردىڭ ەشقايسىسى ەلەۋسىز قالعان جوق. مەملەكەت مىندەتتەمەسىن تولىق ورىندادى. زارداپ شەككەندەردىڭ بارىنە ماتەريالدىق، قارجىلاي قولداۋ كورسەتىلدى، - دەپ جازدى بەرىك ءۋالي.

سونداي-اق ۇيىنەن ايىرىلعاندارعا، كاسىبىنە شىعىن كەلگەندەرگە ناقتى قانشا تەڭگە سوماسىندا كومەك بەرىلگەنى كورسەتىلگەن.

- سۋ تاسقىنىنان زارداپ شەككەن وڭىرلەردە كوميسسيالار جۇمىس ىستەدى، ولار ازاماتتاردىڭ جالعىز باسپاناسى بولعان 19359 ءۇي مەن ساياجاي قۇرىلىستارىن تەكسەردى. ولاردى باسپانامەن قامتاماسىز ەتۋ ماقساتىندا جىلجىمايتىن مۇلىك نارىعىنان 5767 تۇرعىن ءۇي ساتىپ الىندى. 9156 ۇيگە جوندەۋ جۇمىستارى جۇرگىزىلىپ، ءجۇز پايىز اياقتالدى. بۇل ماقساتتارعا بارلىعى 54,7 ميلليارد تەڭگە ءبولىندى. سونداي-اق قىسقا مەرزىمدە 64 ميلليارد تەڭگەگە 2680 جەكە تۇرعىن ءۇي سالىندى.
بۇعان قوسا 36455 وتباسىنا جالپى سوماسى 13,3 ميلليارد تەڭگە، ياكي 100 ا ە ك مولشەرىندە ءبىرجولعى الەۋمەتتىك كومەك كورسەتىلدى. 21876 وتباسىنا 9,9 ميلليارد تەڭگە كولەمىندە 150 ا ە ك-كە دەيىنگى وتەماقى تولەندى.

شاعىن جانە ورتا بيزنەس سۋبەكتىلەرىنە كەلتىرىلگەن زالالدى وتەۋ ءۇشىن 12,1 ميلليارد تەڭگە ءبولىندى. زارداپ شەككەن كاسىپكەرلىك سۋبەكتىلەرىنە تولىق تولەم جاساۋ ماقساتىندا «دەمەۋ» كورپوراتيۆتىك قورىنان اتىراۋ، باتىس قازاقستان جانە سولتۇستىك قازاقستان وبلىستارىنا 2,5 ميلليارد تەڭگە كولەمىندە قوسىمشا قاراجات ءبولۋ ماسەلەسى پىسىقتالدى. اتالعان قاراجات ەسەبىنەن شوب سۋبەكتىلەرىنىڭ 40 ءوتىنىشى بويىنشا شىعىنى وتەلدى. جالپى، وڭىرلىك كوميسسيالار 14,6 ميلليارد تەڭگەگە 734 كاسىپكەردىڭ ءوتىنىمىن ماقۇلدادى، - دەلىنگەن ماقالادا.

ودان بولەك، مال شىعىنىن تولەۋ ءۇشىن مەملەكەت تاراپىنان كورسەتىلگەن كومەكتىڭ كولەمى 2,8 ميلليارد تەڭگەدەن اسقانى ايتىلعان.

ايتا كەتەيىك، بەرىك ءۋالي مەملەكەت باسشىسى قاسىم-جومارت توقايەۆتىڭ جىل بويى اتقارعان قىزمەتىنە شولۋ جاساپ، قوعامدىق- ساياسي ومىردەگى، الەۋمەتتىك- ەكونوميكالىق دامۋداعى ىرگەلى وزگەرىستەر مەن تابىستار تۋرالى باياندادى.

پرەزيدەنت بيىل جۇمىس ساپارىمەن ەلىمىزدىڭ 11 وڭىرىنە باردى. ايماقتارداعى 60-تان اسا وندىرىستىك جانە الەۋمەتتىك- مادەني نىساندارمەن تانىسىپ، جۇرتشىلىقپەن كەزدەستى.