مەملەكەت قايراتكەرى ءسات توقپاقبايەۆقا «حالىق قاھارمانى» اتاعى بەرىلدى

استانا. KAZINFORM - پرەزيدەنت جارلىعىمەن قازاقستان رەسپۋبليكاسىنا سىڭىرگەن اسا ۇزدىك ەڭبەگى ءۇشىن ءسات بەسىمباي ۇلى توقپاقبايەۆقا «حالىق قاھارمانى» اتاعى بەرىلدى. بۇل تۋرالى اقوردانىڭ باسپا ءسوز قىزمەتى حابارلادى.

سونداي-اق مەملەكەت قايراتكەرىنە ايرىقشا ەرەكشەلىك بەلگىسى - «التىن جۇلدىز» بەن «وتان» وردەنى تاپسىرىلدى. 

ايتا كەتەيىك، بيىل قىركۇيەك ايىندا گەنەرال-پولكوۆنيك ءسات توقپاقبايەۆ 85 جاسقا كەلەدى. تاۋەلسىزدىكتىڭ العاشقى جىلدارى ۇلتتىڭ، مەملەكەتتىڭ جانە پرەزيدەنتتىڭ قاۋىپسىزدىگىن قامتاماسىز ەتۋ جۇكتەلگەندەردىڭ ءبىرى - ءسات توقپاقبايەۆ. گەنەرال-پولكوۆنيك وسى جولدا ايانباي ەڭبەك ەتىپ، كۇشتىك قۇرىلىمداردىڭ قالىپتاسۋىنا زور ۇلەس قوستى. ۇلت مۇددەسىن بارىنەن جوعارى قويدى.

ءسات بەسىمباي ۇلىنىڭ باسشىلىعىمەن جاسالعان ۇلتتىق قاۋىپسىزدىك كوميتەتىنىڭ جۇمىستارىن ۇيىمداستىرۋعا قاجەتتى ارناۋلى قۇجاتتاردىڭ كوبىسى ءالى كۇنگە دەيىن قولدانىستا. ونىڭ شەشىمىمەن ۇلتتىق قاۋىپسىزدىك كوميتەتىنىڭ اكادەمياسى قۇرىلىپ، ەلىمىزدىڭ بەلدى وقۋ ورنىنا اينالدى. «تاۋەلسىزدىكتى نىعايتۋ ءۇشىن اۋەلى شەكارانى شەگەندەپ، اتا زاڭىمىزدى كۇشەيتۋ كەرەك بولدى»، - دەيدى گەنەرال.

ءسات بەسىمباي ۇلىنىڭ تاربيەسىن كورىپ، ءتالىم العاندار از ەمەس.

ءسات توقپاقبايەۆ ءماجىلىس دەپۋتاتى بولعان ۋاقىتتا دا مول تاجىريبەسىن، كۇش-جىگەرىن مەملەكەتىمىزدىڭ قارۋلى كۇشتەرى مەن قاۋىپسىزدىگىن نىعايتۋعا قاجەتتى زاڭداردى قابىلداۋعا جۇمسادى. بۇگىندە جۇبايى - بەلگىلى جازۋشى ساۋلە دوسجانمەن قوعامدىق جۇمىستارعا اتسالىسىپ، جاستاردى تاربيەلەۋگە كوڭىل ءبولىپ ءجۇر.