مەملەكەت قارجىلاندىراتىن باسىم سپورت تۇرلەرى 100 گە دەيىن قىسقارتىلادى - زاڭ جوباسى
استانا. KAZINFORM - ەلىمىزدە مەملەكەتتىك بيۋجەتتەن قارجىلاندىرىلاتىن 180 باسىم سپورت ءتۇرى بار. الداعى ۋاقىتتا ولاردىڭ سانى 100 گە قىسقارتىلماق.
ءماجىلىستىڭ الەۋمەتتىك-مادەني دامۋ كوميتەتىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ، سونداي-اق نورمالاردى شەكتەن تىس (شەكتەن تىس) زاڭنامالىق رەتتەۋدى الىپ تاستاۋ تۋرالى» زاڭ جوباسى تالقىلانىپ جاتىر.
«باسىم سپورت تۇرلەرى - وتە كۇردەلى ماسەلە. سوندىقتان قازىرگى ۋاقىتتا ولاردىڭ سانى - 180. ونىڭ ىشىندە وليمپيادالىق، پاراليمپيادالىق باعدارلامالارعا كىرەتىن تۇرلەرى قالادى. جازعى وليمپيادالىق سپورت تۇرلەرى – 46، قىسقى سپورت تۇرلەرى - 15. سونىمەن قاتار ۇلتتىق سپورت مىندەتتى تۇردە باسىم سپورت تۇرلەرىنە كىرەدى. مۇنان بولەك وليمپيادالىق ەمەس، ماسەلەن، 4 جىلدا ءبىر رەت وتەتىن ازيادا ويىندارىنا كىرەتىن دە سپورت تۇرلەرى بار. سولاردىڭ ءبارىن قوسقاندا 100 سپورت ءتۇرى قالادى»، - دەدى زاڭ جوباسىن تانىستىرعان تۋريزم جانە سپورت ۆيتسە-ءمينيسترى سەرىك جاراسبايەۆ.
ونىڭ اتاپ وتۋىنشە، جەرگىلىكتى اتقارۋشى ورگاندار ءۇشىن سپورتتىڭ باسىم تۇرلەرى تىزبەسىن ايقىنداۋ قۇزىرەتى بەرىلەدى. سەبەبى قازىرگى تاڭدا جەرگىلىكتى وليمپيادالىق ەمەس سپورت تۇرلەرىنە 53 تەن 110 عا دەيىن سپورت ءتۇرى دامىپ كەلەدى.
