مەملەكەت نازاربايەۆ ۋنيۆەرسيتەتىن الداعى ءۇش جىل بويى قارجىلاندىرادى

  استانا. KAZINFORM — عىلىم جانە جوعارى ءبىلىم ءمينيسترى ساياسات نۇربەك نازاربايەۆ ۋنيۆەرسيتەتىنە بولىنەتىن قارجىعا ءبىلىم تاپسىرىسى جانە ماقساتتى دەپوزيتتەر كىرەتىنىن ءمالىم ەتتى.

«نازاربايەۆ ۋنيۆەرسيتەتىنە وتكەن جىلداعىداي شامامەن 42 ميلليارد تەڭگە قارجى بولەمىز. الداعى 3 جىلدا ۋنيۆەرسيتەتكە قولداۋ كورسەتەتىن بولامىز. مەملەكەتتەن بولىنگەن قارجىعا مەملەكەتتىك ءبىلىم تاپسىرىسى جانە ماقساتتى دەپوزيتتەر كىرەدى. سوندىقتان، الاڭداۋدىڭ قاجەتى جوق»، - دەدى ساياسات نۇربەك ۇكىمەت وتىرىسىنان كەيىن وتكەن باسپا ءسوز ءماسليحاتىندا.

سونىمەن قاتار مينيستر الداعى 3 جىل بويى بولىنەتىن قارجىنىڭ بيۋدجەتتە بەكىتىلگەنىن ايتتى.

ەسكە سالساق، بىلتىر عىلىم جانە جوعارى ءبىلىم مينيسترلىگى نازاربايەۆ ۋنيۆەرسيتەتىن قارجىلاندىرۋ كولەمى جىلدان- جىلعا ازايىپ كەلە جاتقانىن حابارلاعان ەدى.

«2020 -جىلى نازاربايەۆ ۋنيۆەرسيتەتىن قارجىلاندىرۋعا رەسپۋبليكالىق بيۋدجەتتەن 55243246,6 مىڭ تەڭگە، 2021 -جىلى - 57384102,2 مىڭ تەڭگە، 2022 -جىلى — 45038666,7 مىڭ تەڭگە، ال 2023 -جىلى - 42571878,8 مىڭ تەڭگە ءبولىندى. سوڭعى ەكى جىلدا قارجىلاندىرۋ سوماسى وتكەن جىلدارمەن سالىستىرعاندا ازايدى»، - دەپ جاۋاپ بەردى مينيسترلىك Kazinform ساۋالىنا.