مەملەكەت فەرمەرلەردەن بيدايدى قاي باعامەن ساتىپ الادى
اۋىل شارۋاشىلىعى مينيسترلىگى فەرمەرلەردەن بيداي ساتىپ الۋعا قاتىستى جاسالعان شەشىمگە تۇسىنىك بەردى، دەپ حابارالايدى Kazinform.
«مەملەكەت باسشىسىنىڭ زارداپ شەككەن شارۋاشىلىقتارعا قارجىلاي جانە وزگە دە كومەك كورسەتۋ جونىندەگى تاپسىرماسىن ورىنداۋ ماقساتىندا پرەمەر-ءمينيستردىڭ توراعالىعىمەن بىلتىرعى 9-قازاندا ەكونوميكانى جاڭعىرتۋ جونىندەگى مەملەكەتتىك كوميسسيانىڭ وتىرىسى ءوتتى. وندا ازىق-تۇلىك كەلىسىمشارت كورپوراتسياسىنا قاتىستى شەشىمدەر قابىلداندى. اتاپ ايتقاندا، نارىق دەڭگەيىندە فەرمەرلەر ءۇشىن ساتىپ الۋ باعاسى بەلگىلەندى. بۇل رەتتە، فورۆاردتىق ساتىپ الۋ بويىنشا 3-سىنىپتى بيدايدىڭ باعاسى 120 مىڭ تەڭگەنى، 4-سىنىپتى بيدايدىڭ باعاسى 105 مىڭ تەڭگەنى قۇرادى»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
سونىمەن قاتار، فورۆاردتىق ساتىپ الۋ جانە تاۋار كرەديتى بويىنشا مىندەتتەمەلەردى ورىنداۋ ءۇشىن 1 جىلدىق كەيىنگە قالدىرۋ قاراستىرىلعان.
«ازىق-تۇلىك كەلىسىمشارت كورپوراتسياسىنىڭ رەزەرۆتەرى نەگىزىندە تۇقىم قورىن قالىپتاستىرۋ دا جالعاسادى. بىلتىرعى 5-جەلتوقسانىندا 2023 -جىلدىڭ ءونىمى بويىنشا 350 مىڭ توننا كولەمىندە 4,5-ساناتتاعى جانە سۇرىپتى ەمەس بيدايدى تىكەلەي ساتىپ الۋ جاريالانىپ، ءتيىستى ساتىپ الۋ باعاسى بەلگىلەندى. وسى ماقساتتارعا ۇكىمەت قاۋلىسىمەن كورپوراتسيانىڭ جارعىلىق كاپيتالىن تولىقتىرۋعا 31,3 ميلليارد تەڭگە ءبولىندى. قابىلدانعان شارالار مەن قوسىمشا بولىنگەن قاراجات شارۋالاردى 2024 -جىلعى ەگىس ناۋقانىنا قاجەت قارجى رەسۋرستارىمەن قامتاماسىز ەتۋگە مۇمكىندىك بەرەدى»، - دەپ اتالىپ وتكەن حابارلامادا.
مۇنىمەن قوسا، ازىق-تۇلىك كەلىسىمشارت كورپوراتسياسى قازىرگى كەزدە ساپاسى تومەن استىق پەن 5-سىنىپتى بيدايدى ساتىپ الۋشىلاردى بەلسەندى تۇردە ىزدەستىرىپ جاتىر.
بۇل رەتتە قازاقستان استىعىن ساتىپ الاتىن ەلدەرمەن، ياعني يران، قىتاي، وزبەكستان، ازەربايجان جانە باسقا دا ەلدەرمەن، سونداي-اق قازاقستان نارىعىنداعى ساتىپ الۋشىلارمەن (قۇس ءارى مال وسىرۋشىلەر، سپيرت زاۋىتتارى) كەلىسسوز جالعاسىپ جاتىر.
ەسكە سالساق، بىلتىر كۇزدە اۋىل شارۋاشىلىعى مينيسترلىگى 2023 -جىلى شىققان استىق ءونىمى قازاقستاندى نان، ۇن جانە ماكارون ونىمدەرىمەن تولىق قامتاماسىز ەتۋگە جەتكىلىكتى ەكەنىن جاريالادى.
2023 -جىلدىڭ اياعىندا پارلامەنت دەپۋتاتتارى قازاقستاندا فەرمەرلەر ساپاسى تومەن استىقتان شىعىنعا باتۋى مۇمكىن ەكەنىن ايتقان ەدى.
